ლონდონის "ჩელსის" ახალი მწვრთნელი შესაძლოა ამავე კლუბის ყოფილი ფეხბურთელი ფრენკ ლამპარდი გახდეს. "არისტოკრატების" ასევე ყოფილმა ფეხბურთელმა დიდიე დროგბამ ინსტაგრამის გვერდის მეშვეობით პირდაპირი ჩართვა ჰქონდა და დაადასტურა, რომ კლუბსა და ლამპარდის შორის მოლაპარაება მიმდინარეობს.
კითხვაზე თუ ვინ იქნება მომდევნო მწვრთნელი დროგბამ უპასუხა: "ვინც ახლა მოლაპარაკებას მართავს - ფრენკ ლამპარდი." ასევე, კოტდივუარელმა გულშემატკივრებს მოთმინებისკენ მოუწოდა და როგორც ჩანს "ჩელსი" უახლოეს მომავალში ლამპარდის მთავარ მწვრთნელად დანიშვნის შესახებ განცხადებას გაავრცელებს.
ფრენკი "ჩელსიში" 2001-დან 2014 წლამდე თამაშობდა. ამ ხნის განმავლობაში ლამპარდმა 648 მატჩი ჩაატარა, გაიტანა 211 გოლი და ამ მაჩვენებლით ლონდონური კლუბის ყველა დროის საუკეთესო ბომბარდირი გახდა. "არისტოკრატების" რიგებში ინგლისელმა პრემიერლიგა სამჯერ მოიგო, ხოლო ჩემპიონთა ლიგა - ერთხელ. სამწვრთნელო კარიერა ლამპარდმა "დერბიში" დაიწყო, გუნდი ჩემპიონშიფის პლეი ოფის ფინალამდე მიიყვანა, თუმცა "ასტონ ვილასთან" დამარცხდა.
