"ასტონ ვილამ" "ბრიუგეს" აწ უკვე ყოფილი თავდამსხმელი ვესლი მორაესი დაიმატა. აღნიშნული ინფორმაცია კლუბის ოფიციალურმა ვებგვერდმა გაავრცელა. როგორც Sky Sports-ი იუწყება, ფეხბურთელის სანაცვლოდ ბელგიელებმა 22 მილიონი გირვანქა სტერლინგი მიიღეს, რაც ბირმინგემული კლუბისთვის სარეკორდო ტრანსფერია.
ჯერჯერობით უცნობია თუ რამდენი წლით ითამაშებს ვესლი პრემიერლიგის გუნდში. ბრაზილიელმა ინგლისში სამუშაო უფლება უნდა მიიღოს და ამის შემდეგ კლუბი მას კონტრაქტს გაუფორმებს.
მორაესი "ბრიუგეში" 2016 წელს სლოვაური "ტრენჩინიდან" გადავიდა. გასულ სეზონში ბრაზილიელმა თავდამსხმელმა 48 მატჩი ჩაატარა, გაიტანა 17 გოლი და 10 საგოლე გადაცემა შეასრულა. ბელგიაში გადასვლის დროს სამხრეთამერიკელის სატრანსფერო ღირებულება 600,000 ევრო იყო, მას შემდეგ კი მისი ღირებულება მუდმივად იზრდება და 10 ივნისის მონაცემებით 20 მილიონი ევროა.
