ფეხბურთი

14:23 | 3.06.2019 | ნანახია [] - ჯერ

მსოფლიოს ჩემპიონატი U20: იტალია და კოლუმბია მეოთხედფინალში

პოლონეთში მიმდინარე მსოფლიოს 20 წლამდეჩემპიონატზე ორი მეოთხედფინალისტის ვინაობა გაირკვა. მერვედფინალური ეტაპის საწყის ორი შეხვედრაში მასპინძელი პოლონეთი იტალიას, ხოლო კოლუმბია ახალ ზელანდიას დაუპირისპირდა.

იტალიის 20 წლამდე ნაკრებმა პოლონეთს ანდრეა პინამონტის ერთადერთი გოლით მოუგო. „ინტერის“ ფორვარდმა პენალტი პანენკას სტილში გაიტანა და მატჩის გმირი გახდა. იგივე ითქმის „აძურინის“ კარის დარაჯ ალესანდრო პლიცარიზე, რომელმაც არაერთხელ იხსნა თავისი გუნდი გოლისგან. საბოლოოდ, იტალია შემდეგ ეტაპზე გავიდა. სხვათა შორის, იტალიის ნაკრები მსოფლიოს 20 წლამდე ჩემპიონატის მეოთხედფინალში ზედიზედ მეორედ გავიდა და ამის გაკეთება პირველად მოახერხა.

რაც შეეხება მეორე მერვედფინალურ დაპირისპირებას, დრამატული გამოდგა კოლუმბიასა და ახალ ზელანდიას შორის. გუნდებმა პირველივე ტაიმში გოლები გაცვალეს და საფინალო სასტვენამდე ანგარიში აღარ შეცვლილა. პენალტების სერია კოლუმბიისთვის საშინლად დაიწყო, რადგან საწყისი ორი დარტყმა ვერ გაიტანეს, მაგრამ საბოლოოდ მაინც გაიმარჯვეს - 5:4.

იტალია - პოლონეთი 1:0 (1:0)

გოლი: 1:0 პინამონტი (38, პენ)

კოლუმბია - ახალი ზელანდია 1:1 (1:1) პენ: 5:4

გოლები: 1:0 რეიესი (11), 1:1 ჯასტი (35)

0.149129