მიუნხენის „ბაიერნს“ ჟერომ ბოატენგი დატოვებს. ამის შესახებ „რეკორდმაისტერის“ პრეზიდენტმა ული ჰიონესმა განაცხადა, რომელიც ფიქრობს, რომ ბოატენმგა გუნდი უნდა დატოვოს.

„როგორც მეგობარი ვურჩევ, რომ „ბაიერნი“ დატოვოს, რადგან ახალი გამოწვევა სჭირდება“, - თქვა ულიმ.

შეგახსენებთ, ჟერომ ბოატენგი „ბაიერნს“ 2011 წელს „მანჩესტერ სიტიდან“ შეუერთდა. მას შემდეგ 268 თამაშში 8 გოლი გაიტანა, ხოლო 2018-2019 წლების სეზონში მოედანზე მხოლოდ 28-ჯერ გავიდა. ჯერჯერობით უცნობია სად გააგრძელებს კარიერას 30 წლის გერმანელი.

გარდა ამისა, ჰიონესმა ნიკო კოვაჩის შესახებ ისაუბრა და ზაფხულში მთავარი მწვრთნელის ცვლილება გამორიცხა:

„მომავალ სეზონში ჩვენი მწვრთნელი ნიკო კოვაჩი იქნება. ამის შესახებ დისკუსია გამორიცხულია. გუნდი ვერ შეძლებს ასეთი კარგი თამაშის ჩვენებას, თუ მწვრთნელიც კარგი არაა. მისი გათავისუფლების შესახებ ხმები მხოლოდ ჭორები იყო, 100%-ით „ბაიერნში“ რჩება“, - აღნიშნა ჰიონესმა.

შეგახსენებთ, ნიკო კოვაჩმა „ბაიერნი“ გასულ ზაფხულს ჩაიბარა და სეზონი დუბლით დაასრულა, ხოლო ჩემპიონთა ლიგას მერვედფინალში გამოეთიშა. აღსანიშნავია, რომ „რეკორდმაისტერმა“ გერმანიის ჩემპიონობა და თასი ერთ სეზონში 2016 წლის შემდეგ პირველად მოიპოვა.