კალათბურთი

0:50 | 14.05.2019 | ნანახია [] - ჯერ

18-წლამდელთა ფინალური სერიის პირველ მატჩში “აკადემიამ” “ზაზა 2” 1 ქულით დაამარცხა

დრამატული მატჩით დაიწყო საქართველოს 18-წლამდელთა ჩემპიონატის ფინალური სერია. ზაზა ფაჩულიას აკადემიის მეორე გუნდი და საკალათბურთო კლუბი “აკადემია” ერთმანეთს მთავარი ტიტულისთვის უპირისპირდებიან. პირველივე შეხვედრაში დიდი ბრძოლა გაიმართა, რომელიც თემურ კანკიასა და გელა წულაძის გაწვრთნილი”აკადემიის” გამარჯვებით – 84:83 დასრულდა.

თამაში ისეთი გამოვიდა, ფინალურ სერიას რომ ეკადრება. ფინალების ისტორიაში ეს იყო ერთ-ერთი ყველაზე გამორჩეული მატჩი იმით, რომ მესამე პერიოდში 22 ქულით ჩამორჩენილმა გუნდმა გამარჯვების მოპოვება შეძლო. სწორედ 22 ქულას – 45:67 აგებდა “აკადემია” შეხვედრის 25-ე წუთისთვის, ანუ მესამე პერიოდის შუაწელში. სწორედ იმ მომენტში, როცა “ზაზას” უპირატესობამ პიკს მიაღწია, აკადემიელებმა მობილიზება მოახდინეს და მესამე პერიოდის დარჩენილ 4 წუთში ჩამორჩენა 11 ქულამდე შეამცირეს – 61:72.

ირაკლი მაისურაძემ წუთშესვენება არაერთხელ აიღო, მაგრამ ვერც აკადემიელთა შტურმის შეჩერება მოხერხდა და ვერც “ზაზას” მოთამაშეები საბრძოლო რელსებზე დაბრუნება. შეხვედრის დასრულებამდე 6 წუთით ადრე ირაკლი სულხანივილმა სამქულიანით ანგარიში გაათანაბრა – 74:74, რის შემდეგაც თამაში ქულა-ქულაში გაგრძელდა და ხან ერთი გუნდი დაწინაურდებოდა, ხანაც – მეორე.

გადამწყვეტი აღმოჩნდა ბოლო წუთები. ლაშა მიქელაძის შედეგიანობით “აკადემიამ” შეხვედრის დასრულებამდე 2 წუთით ადრე 4-ქულიანი ლიდერობა მოიპოვა (81:77), თუმცა ანზორ ნადირაძის საჯარიმოებით და დაჩი ქავთარაძის სამქულიანით “ზაზამ” ლიდერობა ბოლო წუთზე დაიბრუნა – 83:81. “აკადემიას” შესატევად 30 წამი ჰქონდა და კანკიას გუნდს გათანაბრების საშუალება მიეცა: ლაშა მიქელაძე საჯარიმოს ხაზზე დადგა, თუმცა მხოლოდ 1 ჩააგდო და “ზაზას” ქულიანი უპირატესობა და შესატევად 20 წამი დარჩა. საკვანძო მომენტიც აქ გათამაშდა. აკადემიელთა ერთ-ერთმა ლიდერმა ირაკლი სულხანიშვილმა ირაკლი კილაძეს ჩაუჭრა და კონტრშეტევა თავადვე შედეგიანად დააგვირგვინა – 84:83. “აკადემიამ” “ზაზას” შეტევა მოიგერია და გამარჯვება გაიფორმა.

გამარჯვებულებს 24 ქულით და 11 მოხსნით ლაშა მიქელაძემ ულიდერა. 18 ქულა და 8 მოხსნა სულხანიშვილმა მიითვალა, ბექა ბექაიას ანგარიშზე კი 16 ქულა დაგროვდა. “ზაზა 2”-ში 23 ქულითა და 8 პასით საუკეთესო იყო დაჩი ქავთარაძე, ანზორ ნადირაძის ანგარიშზე კი 22 ქულა და 16 მოხსნა დაგროვდა.

ფინალური სერიის მეორე შეხვედრა ოლიმპიურ სასახლეში ხვალ, 14 მაისს, 15:45 საათზე გაიმართება.

აკადემია – ზაზა 2
სტატისტიკა: 84:83

www.gbf.ge

Loading...
0.130768