ლეგენდარული იტალიელი მეკარე ჯანლუიჯი ბუფონი მიმდინარე სეზონის დასრულების შემდეგ „პარი სენ ჟერმენს“ დატოვებს. როგორც Marca იტყობინება, პარიზული გუნდი 41 წლის კიპერთან კონტრაქტის გახანგრძლივებას არ გეგმავს.

აღსანიშნავია ტომას ტუხელის კომენტარი, რომელიც გუშინ გააკეთა: „ამიერიდან მეკარის პოზიციაზე როტაციას აღარ მივმართავთ, ეს სხვაგან არსად ხდება“.

პსჟ-ში მიმდინარე სეზონში ხან ალფონს არეოლა თამაშობდა, ხანაც ბუფონი. ტუხელის განცხადება კი მიანიშნებს იმაზე, რომ ჯიჯის ადგილი გუნდში აღარაა. იტალიელს ფრანგულ გუნდთან კონტრაქტი 30 ივნისს ეწურება.

შეგახსენებთ, რომ ბუფონი პსჟ-ს ერთი წლის წინ თავისუფალი აგენტის სტატუსით შეუერთდა და 23 მატჩში 21 გოლი გაუშვა. მანამდე „პარმასა“ და „იუვენტუსის“ კარს იცავდა, ხოლო იტალიის ნაკრებში 176 თამაშში 117 გოლი აქვს გაშვებული. ჯერჯერობით უცნობია, რა გადაწყვეტილებას მიიღებს ჯიჯი - გააგრძელებს ფეხბურთის თამაშს სხვა გუნდში თუ კარიერას დაასრულებს.