საქართველოს ოთხგზის ჩემპიონ ქუთაისის „ტორპედოში“ ფინანსური პრობლემებია. გუნდში არსებული ვითარების შესახებ ღიად ისაუბრა მთავარმა მწვრთნელმა კახა ჩხეტიანმა.
იმერული კლუბის თავკაცმა ფეხბურთელებს მადლობა გადაუხადა, რომ ფინანსური მდგომარეობა გუნდის სათამაშო ხარისხს არ ეტყობა. აღნიშნა, რომ ყველაფერი მას შემდეგ გადაწყდება, რაც გუნდის პრეზიდენტი ზაალ ჩაჩავა საქართველოში დაბრუნდება.
„მინდა მადლობა ვუთხრა ჩვენს ბიჭებს, რადგან ყველამ ვიცით, რა პრობლემებიც არის ჩვენს გუნდში, მაგრამ ეს მათ თამაშს არ ეტყობა. გამოდიან მოედანზე, ერთმანეთისთვის, გულშემატკივრებისთვის და ამ გუნდისთვის თამაშობენ.
ფინანსური პრობლემები ნამდვილად არის გუნდში. ჩვენი პრეზიდენტი ჩამოვა საქართველოში, შევხდება გუნდს და როგორც მითხრა, ახალი ინფორმაციით ჩამოდის და თვითონ იტყვის, როგორ და რა იქნება მომავალში. ჩინელები, რომლებიც გუნდში იყვნენ, წავიდნენ და ახალი სპონსორის ძიებაში ვართ. ვიმედოვნებ, რომ ყველაფერი დალაგდება და ქუთაისის „ტორპედო“ გააგრძელებს ჩემპიონობისთვის ბრძოლას. კარსაა მომდგარი ევროპა ლიგა, სადაც ჩვენს ქვეყანას წარმოადგენს და ძალიან მნიშვნელოვანია ეს ტურნირი ჩვენთვის.
ფეხბურთელები პროფესიონალები არიან და აგრძელებენ გუნდთან ერთად ვარჯიშს. პირველი წრის მერე მაინც ვერსად ვერავინ წავიდოდა. ისიც ვუთხარი, რომ თუ ვინმეს პრობლემა ჰქონდა, ეთქვა, თუნდაც ოჯახში, მაგრამ ყველანი გუნდში არიან როგორც ხედავთ, ვარჯიშზეც, თამაშზეც გამოდიან და მაქსიმალურად იხარჯებიან. უფალი დაგვიფასებს ამ ყველაფერს. ვნახოთ, დაველოდოთ პრეზიდენტის ჩამოსვლას და ყველანი ყველაფერს გაიგებთ. იმედია, უკეთესად გაგრძელდება ყველაფერი“, - თქვა ჩხეტიანმა.
შეგახსენებთ, „ტორპედო“ საქართველოს კრისტალბეთ ეროვნულ ლიგაში 12 ჩატარებულ მატჩში მოპოვებული 23 ქულით მეორე საფეხურზე იმყოფება.
