საქართველოს კრისტალბეთ ეროვნული ლიგის მე-12 ტურში ხმაურიანი სენსაცია დაფიქსირდა. გათამაშების აუსტაიდერმა და ბოლოადგილოსანმა „რუსთავმა“ მოქმედი ჩემპიონი და ერთპიროვნული ლიდერი „საბურთალო“ დაამარცხა.

ქვემო ქართლელებმა მთელი 10 ტური მოუგებლად ჩაატარეს და მერე მხსნელად ვარლმა კილასონიას უხმეს. გამოცდილი სპეციალისტის ხელში კი „რუსთავი“ შეიცვალა და ორ თამაშში ქულათა მაქსიმუმი (6) გამოადნო. წინა ტურში კილასონიას გუნდმა „ვიტ ჯორჯიას“ ბოლო 15 წუთში შემოუტრიალა თამაში (3:2), ხოლო ახლა ლიდერი არ დაინდო.

უგოლო პირველი ტაიმის შემდეგ რუსთაველებმა მეორე ნახევარში მოახერხეს უპირატესობის ხელში ჩაგდება. პაატა კიტეიშვილის დიდებული თამაშის შედეგად ანგარიში ლუკა იმნაძემ გახსნა. 74-ე წუთზე კი, ფარხად გისტაროვმა დაახლოებით 30 მეტრიდან საოცარი სიზუსტით დაარტყა და სხვაობა გაორმაგდა. მსაჯის მიერ დამატებულ წუთებზე ორი გოლი კიდევ გავიდა. ჯერ დაჩი ცნობილაძემ შეამცირა სხვაობა და თავის გუნდს ქულის მოპოვების იმედი ჩაუსახა, მაგრამ ორ წუთში ლუკა ზვიადაძემ მასპინძელთა გამარჯვებას ბეჭედი დაარტყა - 3:1.

„რუსთავმა“ ზედიზედ მეორე თამაში მოიგო, 9 ქულა დააგროვა და „ლოკომოტივს“ გაუთანაბრდა. „საბურთალო“ კი 24 ქულით ლიდერობას ინარჩუნებს, მაგრამ თუ შაბათს, ბათუმის „დინამო“ მოიგებს, აჭარლები გალიდერდებიან.

სხვათა შორის, ხვალ კრისტალბეთ ეროვნულ ლიგაში სუპერმატჩია: ბათუმში, ორი „დინამო“ ერთმანეთის წინააღმდეგ გაირჯებიან.

„რუსთავი“ – „საბურთალო“ 3:1 (0:0)

გოლები: 1:0 იმნაძე (59), 2:0 გისტაროვი (74), 2:1 ცნობილაძე (90), 3:1 ზვიადაძე (95)