ინგლისური „ლივერპულის“ მთავარმა მწვრთნელმა იურგენ კლოპმა „ბარსელონასთან“ ისტორიულ გამარჯვებას (4:0) თავის კარიერაში განსაკუთრებული უწოდა. გერმანელი სპეციალისტის განცხადებით, რაც მოხდა დაუჯერებელია და დასძინა, რომ ასეთი ქამ-ბექის გაკეთება მხოლოდ მის შეგირდებს შეეძლოთ.

„ჩემს ცხოვრებაში სხვა განსაკუთრებული საღამოებიც ყოფილა, მაგრამ ეს განსხვავებულია. თამაშამდე ჩემი მოსაზრება იყო, რომ მცირე შანსი გვქონდა, ბიჭებსაც ვუთხარი, რომ 4 გოლის გატანა რთული იქნებოდა, მაგრამ მხოლოდ მათ შეეძლოთ ამის გაკეთება და ასეც მოხდა.

გუნდმა დიდი ხასიათი გამოაჩინა გარდა იმისა, რომ სანახაობრივი ფეხბურთი ითამაშა. 4:0 მოვიგეთ და ნამდვილად რთულია ამის დაჯერება. უცნაურია, განსაკუთრებულია. თამაშის შემდეგ ვუყურებდი ჩემს ფეხბურთელებს თვალებში და ღიმილიც კი აღარ შეეძლო. ეს თამაში მათთვის ბევრს ნიშნავდა, ისევე, როგორც ჩვენი გულშემატკივრებისთვის. „ბარსელონას“ წინააღმდეგ ვითამაშეთ სალაჰისა და ფირმინოს გარეშე და მეტოქეს ერთი გოლიც ჰყოფნიდა. უმაღლეს დონეზე ვითამაშეთ“, - თქვა კლოპმა.

შეგახსენებთ, რომ „ლივერპული“ ისტორიაში მეცხრედ და მათ შორის, ზედიზედ მეორედ გავიდა ჩემპიონთა ლიგის ფინალში, სადაც 1-ელ ივნისს „აიაქსისა“ და „ტოტენჰემის“ წყვილში გამარჯვებულს შეხვდება.