საქართველოს ჰოკეისტთა ეროვნულმა ნაკრებმა 2019 წლის მსოფლიო ჩემპიონატის II დივიზიონის B ჯგუფში თამაში მე-4 ადგილზე დაასრულა, რითაც აღნიშნულ დონეზე გარჯის უფლება საგაისოდაც შეინარჩუნა.

როლანდ სვანიძის შეგირდებმა დასკვნითი შეხვედრა ჩემპიონ ისრაელთან ჩაატარეს და მართალია, 3:7 (1:2, 0:4, 2:1) წააგეს, ბიჭებისადმი სასაყვედურო არაფერი გვაქვს. ქართველი ჰოკეისტები მსოფლიო პირველობის II დივიზიონში პირველად ირჯებოდნენ და ხუთიდან ორი მატჩის მოგება მოახერხეს, რითაც უპირველესი მიზანი ანუ ლიგაში დარჩენა მიღწეულ იქნა.
შეგახსენებთ, რომ ქართველმა ჰოკეისტებმა მექსიკურ სანტა ფეში მიმდინარე შეჯიბრის საწყის ტურში ჩრდილოეთ კორეასთან 4:9 წააგეს, რასაც მასპინძლებთან გამარჯვება (3:2) მოჰყვა, შემდეგ ახალ ზელანდიასთან მარცხი (2:6) იყო, ბოლოსწინა ტურში კი – ისლანდიასთან მოგება (6:3), რამაც მექსიკა და ჩრდილოეთ კორეა უკან მოგვეტოვებინა.
როგორც აღვნიშნეთ, B დივიზიონის ოქროს მედლები ისრაელმა მოიპოვა, ვერცხლი ისლანდიას ერგო, ბრინჯაო – ახალ ზელანდიას, დაქვეითება კი ჩრდილოეთ კორეას მოუხდა, რომელმაც ბოლო ტურში პრინციპული შეხვედრა მექსიკასთან წააგო.

21 აპრილი
საქართველო – ჩრდილოეთ კორეა 4:9
ისრაელი – ისლანდია 6:3
მექსიკა – ახალი ზელანდია 2:7

22 აპრილი
ისლანდია – ჩრდილოეთ კორეა 8:0
ახალი ზელანდია – ისრაელი 3:5
მექსიკა – საქართველო 2:3

24 აპრილი
ახალი ზელანდია – საქართველო 6:2
ისრაელი – ჩრდილოეთ კორეა 9:3
ისლანდია – მექსიკა 8:1

26 აპრილი
ჩრდილოეთ კორეა – ახალი ზელანდია 5:8
საქართველო – ისლანდია 6:3
მექსიკა – ისრაელი 4:5 (ოტ.)

27 აპრილი
ისრაელი – საქართველო 7:3
ისლანდია – ახალი ზელანდია 4:2
ჩრდილოეთ კორეა – მექსიკა 2:8