უეფას ჩემპიონთა ლიგას მიმდინარე სეზონის ბოლოს ახალი გამარჯვებული ეყოლება და მადრიდის „რეალის“ სამწლიანი ჰეგემონია დასრულდება. ეს ცნობილი ჯერ კიდევ მერვედფინალების შემდეგ გახდა.

ახლა კი, როდესაც ნახევარფინალისტების ვინაობაც ცნობილია, კიდევ ერთი რამ გახდა ნათელი: ჩემპიონთა ლიგის მომგებ მწვრთნელთა სიას კიდევ ერთი შეემატება. ერნესტო ვალვერდეს („ბარსელონა“), მაურისიო პოჩეტინოს („ტოტენჰემი“), ერიკ ტენ ჰაგსა („აიაქსი“) და იურგენ კლოპს („ლივერპული“) ჩემპიონთა ლიგა არასდროს მოუგიათ.

ასეთ წარმატებასთან ყველაზე ახლოს სწორედ კლოპი იყო, რომელიც 2013 და 2018 წლებში ფინალში ორჯერ დამარცხდა („დორტმუნდით“ და „ლივერპულით“). დანარჩენი სამი სპეციალისტი კი, არათუ ფინალში, არამედ ნახევარფინალურ სტადიაზეც პირველად არიან.

აღსანიშნავია, რომ ბოლოს მსგავსი შემთხვევა ჩემპიონთა ლიგაზე 2003-2004 წლების სეზონში დაფიქსირდა. ჟოზე მოურინიოს („პორტუ“), ხავიერ ირურეტას („დეპორტივო“), კლაუდიო რანიერის („ჩელსი“) და დიდიე დეშამს („მონაკო“) ჩემპიონთა ლიგა არ ჰქონდათ მოგებული.

აქედან მოყოლებული კი, ოთხეულში მინიმუმ ყოველთვის იყო ერთი ისეთი მწვრთნელი, რომელსაც ევროპის მთავარი საკლუბო ტურნირი მოგებული ჰქონდა.