საქართველოს ბერძნულ-რომაული სტილით მოჭიდავეთა ნაკრების წევრი ლაშა გობაძე (82 კგ.) რუმინეთის დედაქალაქ ბუქარესტში მიმდინარე ევროპის ჩემპიონატის ფინალში გავიდა და ხვალ, ოქროს მედლის მოსაპოვებლად იბრძოლებს.

გობაძე შეჯიბრში მერვედფინალიდან ჩაება, სადაც მოლდოველ მიჰაილ ბრადუს 5:4 სძლია, მეოთხედფინალში რუს ალეკსანდრ კომაროვს 5:0 სძლია, ნახევარფინალში კი, ფინელ ვილი როპონენს ჩინებული ხუთქულიანი გდებები გაუკეთა და მეტოქე წამებში 11:0 გაანადგურა.
გადამწყვეტ შერკინებაში ლაშას მეტოქე დანიის სახელით მოასპარეზე რაიბეკ ბისულთანოვი იქნება, რომელმაც გზიდან გერმანელი ჰანს ვაგნერი (5:4), ბელარუსი ვიკტარ სასუნოსკი (8:1) და თურქი ემრაჰ კუსი (5:5) ჩამოიცილა.
ხვალ, 14 აპრილსვე ბრინჯაოს მედლისთვის იჭიდავებს საჩინო დავითაია (67 კგ.), რომელმაც კვალიფიკაციაში ფრანგი იასინ ოზაი 6:4 დაამარცხა, მერვედფინალში გერმანელ ერიკ ვეისს 9:0 მოუგო, მეოთხედფინალში უკრაინელ პარვიზ ნასიბოვს 2:1 სძლია, ნახევარფინალში კი თურქ ატაკან იუკსელთან 1:3 წააგო.
თუ ვინ იქნება დავითაიას მომავალი მეტოქე, რეპეშაჟის შეხვედრების დასრულების შემდეგ გაირკვევა, თუმცა, დიდი ალბათობით, ქართველ ფალავანს რუს არტიომ სურკოვთან დაპირისპირება მოუწევს.
შაბათსვე ევროპის ჩემპიონატში რამაზ სურმანიძე (60 კგ.), რამაზ ზოიძე (72 კგ.) და გიორგი მელიაც (97 კგ.) ჩაებნენ, თუმცა, მათ პირველივე ორთაბრძოლები დათმეს.