საქართველოს თავისუფალი სტილით მოჭიდავეთა ნაკრების წევრებმა ნიკა კენჭაძემა (79 კგ.) და ელიზბარ ოდიკაძემ რუმინეთის დედაქალაქ ბუქარესტში მიმდინარე ევროპის 2019 წლის ჩემპიონატზე ბრინჯაოს მედლები მოიპოვეს.

კენჭაძემ მე-3 ადგილისთვის შერკინებაში ბელარუსი ანდრეი კარპაჩი 7:1 დაამარცხა (მანამდე, რეპეშაჟში გერმანელ ფრანკო მარიო ბუეტნერს 7:2 სძლია), ოდიკაძემ კი, მოლდოველ ნიკოლაი ჩებანს 3:0 მოუგო.
ხვალ, 10 აპრილს მედლები დარჩენილ ხუთ წონით კატეგორიაში გათამაშდება და ქართველ ფალავნებს 4 მედლის აღების შანსი აქვთ.
ფინალში იჭიდავებენ ბექა ლომთაძე (61 კგ.) და გენო პეტრიაშვილი (125 კგ.). ლომთაძემ გზიდან მაკედონიელი ელმედინ სეიფულაუ (10:0) და შვეიცარიელი რენდი ადრიან ვოკი (10:0) ჩამოიცილა, გადამწყვეტ შეხვედრაში კი მისი მეტოქე სომეხი არსენ არუტუნიანი იქნება.
პეტრიაშვილმა ფინალამდე სამ მეტოქეს აჯობა: უნგრელ დანიელ ლიგეტის (7:4), პოლონელ რობერტ ბარანსა (10:2) და უკრაინელ ოლეკსანდრ ხოციანოვსკის (3:2). ქართველი მოჭიდავე ოქროს მედლისთვის პრინციპულ მეტოქე ტაჰა აკგულს (თურქეთი) დაუპირისპირდება.
ბრინჯაოსთვის რუს მაგომედ კურბანოვს შეერკინება ირაკლი მწითური (92 კგ.), რომელიც ნახევარფინალში აზერბაიჯანელ შარიფ შარიფოვთან 2:8 დამარცხდა, მანამდე კი, რუმინელ ადრიან რეკორეანს 7:0 სძლია.
რეპეშაჟშია გადართული ავთანდილ კენჭაძე (74 კგ.), რომელმაც სომეხ ვარუჟან კაჯოიანსა და თურქ იაკუპ გორს 10:0 სძლია, მეოთხედფინალი კი, დასანანად, 3:3-ზე დათმო საფრანგეთის სახელით მოასპარეზე ზელიმხან ხაჯიევთან.
ხვალ, ქართველი ფალავანი ავსტრიელ სიმონ მარჩლსა და ესტონელ აიმარ ანდრუსესთან უმჯობესს გაეჯიბრება და თუკი იმარჯვა, ბრინჯაოს მედლისთვის ჭიდილი უკრაინელ ვასილ მიხაილოვთან მოუწევს.