იტალიაში, სიცილიის რეგიონის სამოყვარულო ლიგის მესამე დივიზიონში 55 წლის ფეხბურთელი იგნაციო ბარბაგალო პირდაპირ მოედნიდან თამაშის მომდინარეობისას გაიტაცეს.
„ვიაგრანდესა“ და „ნებროდის“ მატჩის მეორე ტაიმის 22-ე წუთზე მოედანზე ვერტმფრენი დაეშვა, საიდანაც სამი შეიარაღებული პიროვნება გადმოვიდა და ბარბაგალო ვერტმფრენში ჩასვეს, რის შემდგომაც სტადიონის მიმდებარე ტერიტორია დატოვეს. ბუნებრივია, მომხდარმა გაუგებრობა და შიში გამოიწვია, მაგრამ აღმოჩნდა, რომ ეს ყველაფერი დადგმული სპექტაკლი იყო, რომლის ინიციატორი თავად 55 წლის მოთამაშე გახლდათ.
„ადრე თუ გვიან უნდა შეჩერდე. ფეხბურთს 14 წლიდან ვთამაშობ და ახლა 55 წლის ვარ, მეტი არ შემიძლია. ასეთი სტილის გამოსამშვიდობებელი მატჩით კი ისტორიაში შევედი“, - თქვა სიუჟეტის გმირმა.
მიუხედავად იმისა, რომ ბარბაგალომ კარიერა დაასრულა, ჯარიმას მაინც ვერ გადაურჩა. Sky Sport-ის ცნობით, მას 200 ევროს გადახდა დაეკსრა და 31 მაისამდე დისკვალიფიკაციაც მიესაჯა.
