ფეხბურთი

2:52 | 25.03.2019 | ნანახია [] - ჯერ

შვეიცარიელი ფეხბურთელი საქართველოსთან მატჩზე: "საშინელება იყო, არაფერი მახსოვს"

შვეიცარიის ნაკრების მცველ ფაბიან შარს საქართველოს ნაკრებთან მატჩი არ ახსოვს. ამის შესახებ „ნიუკასლ იუნაიტედის“ ფეხბურთელმა თავად განაცხადა. საქმე ისაა, რომ პირველ ტაიმში შვეიცარიელი მცველი და ჯიმი ტაბიძე მეორე სართულზე ბრძოლისას ერთმანეთს შეეჯახნენ.

შედეგად, შარი მოედანზე უგონოდ დაეცა და ჯანო ანანიძემ იყოჩაღა, რომელიც მეტოქესთან პირველი მივიდა და დახმარება გაუწია, მერე საქმეში მედიკოსებიც ჩაერთვნენ. შარის განცხადებით, ეს საშინელი მომენტი იყო:

„ალბათ საშინელება იყო, მაგრამ მე არაფერი მახსოვს. რამდენიმე წამი გათიშული ვიყავი. კისერი ახლაც მტკივა და შუბლზე სისხლჩაქცევა მაქვს, მაგრამ ეს ღირდა“, - განუცხადა შვეიცარიელმა გამოცემა Blick-ს.

სხვათა შორის, იმ ეპიზოდში დაზიანება ტაბიძემაც მიიღო და მეორე ტაიმში თამაში ვეღარ გააგრძელა. როგორც გაირკვა, ქართველ ფეხბურთელს ტვინის შერყევა აღენიშნება და ამიტომ, გუნდს ირლანდიაში საერთოდ ვერ გაჰყვა.

ფაბიან შარის კი რა უჭირს, შეუცვლელადაც ითამაშა და პირველ გოლში ჩინებული გადაცემით უდიდესი წვლილიც შეიტანა...

Loading...
0.147541