სხვა

16:37 | 13.03.2019 | ნანახია [] - ჯერ

500 დღე ტოკიოს 2020 წლის ოლიმპიური თამაშებამდე: პიქტოგრამების პრეზენტაცია

ტოკიოს 2020 წლის ოლიმპიური თამაშების საორგანიზაციო კომიტეტმა სპორტის სახეობათა ოფიციალური პიქტოგრამები წარმოადგინა და ამგვარად, თამაშების დაწყებამდე უკუთვლა დაიწყო. ოთხწლეულის უმთავრესი სპორტული ღონისძიების დაწყებამდე ზუსტად 500 დღე რჩება.

პიქტოგრამები ვიზუალურად ასახავენ სპორტის კონკრეტულ სახეობას, რაც თავის მხრივ ერთგვარი გზამკვლევის როლსაც ასრულებს როგორც სპორტსმენებისთვის, ისე - გულშემატკივრებისთვის.

აღსანიშნავია, რომ პიქტოგრამები პირველად 1948 წლის ლონდონის ოლიმპიურ თამაშებზე გამოიყენეს.

ტოკიოს თამაშების მასპინძელთა განცხადებით, პიქტოგრამები თითქმის ორწლიანი მუშაობის შედეგია, რომელსაც სათავეში ედგა ცნობილი იაპონელი დიზაინერი მასააკი ჰირომურა.

ტოკიოს ოლიმპიურ თამაშებზე წარმოდგენილი იქნება სპორტის 33 სახეობა, ამასთან ზოგიერთ მათგანს რამდენიმე პიქტოგრამა ექნება. მაგალითად, ველოსპორტის შემთხვევაში ასეთი ხუთია, ხოლო ცხენოსნობასა და ტანვარჯიშში პიქტოგრამები შესაბამისი სახეობების სხვადასხვა დისციპლინებს აღნიშნავს.

საინტერესოა, რომ პიქტოგრამები პირველად შეიქმნა ოლიმპიურ პროგრამაში შესული კარატესთვის, სკეიტბორდინგისთვის, მეკლდეურობისა და სერფინგისთვის. ასევე შეიქმნა პიქტოგრამები ახალი დისციპლინებისთვის: 3X3 კალათბურთისთვის და BMX ფრისტაილისთვის, რომლებსაც ასევე დებიუტი ექნებათ ტოკიოს თამაშებზე.

www.geonoc.org.ge

0.142879