კრისტალბეთ ეროვნული ლიგა 2-ის 2019 წლის სეზონი დღეს, სამტრედიაში, „ეროსი მანჯგალაძის“ სტადიონზე გაიხსნა. პირველი შეხვედრა ადგილობრივ გუნდსა და „ზუგდიდს“ შორის გაიმართა.

შეხვედრა დაძაბული გამოდგა და მასპინძელთა გამარჯვებით დასრულდა. ანგარიში გურამ სამუშიამ გახსნა, რომელმაც მეგრელთა კარი 22-ე წუთზე დალაშქრა. 63-ე წუთზე სტუმრები გიორგი კილასონიას გაძევების შემდეგ მოედანზე 10 ფეხბურთელით დარჩნენ, თუმცა მალევე „ზუგდიდმა“ ანგარიში მაინც გაათანაბრა. თავი ნიკოლოზ ხინთიბიძემ გამოიჩინა.

მიუხედავად ამისა, „სამტრედიამ“ რიცხობრივი უპირატესობის გამოყენება მოახერხა და 73-ე წუთზე გოგიტა გოგატიშვილის ავტოგოლით გამარჯვება მოიპოვა.

ამრიგად, კახა კაჭარავას გუნდმა სეზონის პირველივე შეხვედრაში სამი ქულის მოპოვება მოახერხა და 2019 წელი ამაღლებულ ნოტაზე დაიწყო.

„სამტრედია“ – „ზუგდიდი“ 2:1 (1:0)

გოლები: 1:0 სამუშია (22), 1:1 ხინთიბიძე (68, პენ), 2:1 გოგატაშვილი (73, ა.გ)