ავტოსპორტი

17:26 | 14.02.2019 | ნანახია [] - ჯერ

„რეისინგ პოინტიც“ მზადაა

ვინც ჯერ კიდევ არ იცის - „რეისინგ პოინტი“ ყოფილი „ფორს ინდიაა“. მის ახალ მფლობელებს გუნდისთვის სახელის შეცვლა, გასულ სეზონშივე სურდათ, მაგრამ ამ შემთხვევაში ქულები დაიკარგებოდა და კონსტრუქტორთა ჩემპიონატში ნული ქულით ჩაებმებოდნენ. ამიტომ, სახელის გადარქმევა სეზონის შემდეგ გადაწყდა.

გუნდმა თავისი განახლებული ფორმა, რომლითაც ახალ სეზონში იასპარეზებს, კანადის საერთაშორისო ავტო შოუზე წარადგინა. „რეისინგ პოინტის“ ახალი სატიტულო სპონსორია კენიური „სპორტპესა“, რომელიც ტოტალზატორის ბიზნესზეა სპეციალიზებული და კენიის გარდა, ამ საქმეს ტანზანიასა და სამხრეთ აფრიკაშიც აწარმოებს.

საინტერესოა, რომ გუნდს თავიდან სახელად „ლოლას“ (ავტოსპორტში და მათ შორის, ფორმულა 1-შიც სახელმოხვეჭილი ბრენდია) დარქმევა სურდა, მაგრამ ამის უფლება ვერ მოიპოვა და საბოლოოდ, ისევ „რეისინგ პოინტი“ არჩია.

გუნდს კარგი ტექნიკური ბაზა აქვს და როგორც მისი ტექნიკური დირექტორი ენდრიუ გრინი ამბობს, ფინანსურადაც როგორც არასდროს, ისეა უზრუნველყოფილი. ამას დაუმატეთ „მერსედესის“ აგრეგატი, რომელიც ჯერაც საუკეთესოდ ითვლება ფ1-ში და შეიძლება ითქვას, რომ „რეისინგ პოინტისგან“ ისევ საშუალოთა შორის საუკეთესოს სახელისთვის ბრძოლაა მოსალოდნელი.

ახალ სეზონში „რეისინგ პოინტის“ პილოტები იქნებიან მექსიკელი სერხიო პერსესი და კანადელი ლანს სტროლი.

Loading...
0.127919