ავტოსპორტი

4:33 | 14.02.2019 | ნანახია [] - ჯერ

„რედ ბულმა“ „ჰონდას“ ძრავიანი პირველი სარბოლო ავტომობილი გვიჩვენა

„რედ ბულ რეისინგმა“ თავის ისტორიაში ახალი ეტაპი დღეს, ახალი სარბოლო ავტომობილის, RB15-ის ტრასაზე გამოყვანით დაიწყო. ახალი ეტაპი იმიტომ, რომ გუნდმა გასული სეზონის ბოლოს დაასრულა „რენოსთან“ პარტნიორობა, ვისთან ერთადაც, მსოფლიო ჩემპიონატი ოთხჯერ დუბლით მოიგო და „ჰონდას“ ძრავებზე გადავიდა.

რამდენიმე სხვა გუნდის მსგავსად, ავსტრიული გუნდის ავტომობილიც განსხვავებულად არის გაფორმებული, თუმცა ასე დიდხანს არ იქნება და ალბათ წინასასეზონო ტესტების ბოლოსკენ, მანქანებს „წითელი ხარებისთვის“ ჩვეულ ფორმას ჩააცმევენ.

გასულ სეზონში „რედ ბულისთვის“ მიწოდებული „რენოს“ ძრავები, საათების მწარმოებელი „TAG ჰოიერის“ სახელით იყო ბრენდირიებული. ეს კომპანია სპონსორთა შორის დარჩა, თუმცა სტატუსს შეიცვლის. შესაბამისად, მის ლოგოს ძრავის ადგილზე, „ჰონდას“ წარწერა შეცვლის. იმავდროულად, სპონსორებს შორის დარჩა „ასტონ მარტინი“, რომელსაც „რედ ბული“ და მისი მთავარი ინჟინერი ედრიან ნიუი, ჰიპერ ავტომობილ „ვალკირის“ შემუშავებაში დაეხმარა.

„რედ ბულმა“ მეტოქე „მერსედესის“ მსგავსად, ახალი ავტომობილი პირველად სილვერსტოუნის ტრეკზე გამოიყვანა. და სანამ ეს მოხდებოდა, ინტერნეტით მისი სტუდიური ფოტოები გაავრცელა. კომპანია „რედ ბულის“ მეორე გუნდ - „სკუდერია ტორო როსო“, თავისი უახლესი ავტომობილით „ფილმის დღეს“ მისანოს ტრეკზე ატარებს.

„რედ ბულის“ პირველი პილოტი მაქს ფერსტაპენი ამბობს, რომ ახალი მანქანით კმაყოფილია, თუმცა სეზონის პირველ რბოლამდე (მელბურნი, ავსტრალია), მიზნების დასახვას არ აპირებს.

Loading...
0.152819