„ტორო როსომ“ თავისი 2019 წლის სეზონისთვის მომზადებული სარბოლო ავტომობილი, „ჰონდას“ ძრავით აღჭურვილი STR14 წარმოადგინა. ეს ავტომობილი თვალსაჩინოდ წარმოგვიდგენს იმ ცვლილებებს, რომლებიც აეროდინამიკის ახალი რეგლამენტის გამო მოხდა ავტომობილების გარეგნობაში.

იტალიურ საჯინიბომდე, თავისი ახალი მანქანა „ჰაასმა“ გვიჩვენა, თუმცა ამერიკულ გუნდს სიახლეები დაფარული ჰქონდა და მხოლოდ VF-19-ის წინა ფრთის ახალი და ისიც, გამარტივებული კონსტრუქცია გამოაჩინა.

„ტორო როსომ“ გასული სეზონი კონსტრუქტორთა ჩემპიონატი მეცხრე ადგილზე დაასრულა. ახალი სეზონისთვის გუნდი „რედ ბულ რეისინგის“ შარშანდელი მანქანის ნაწილებს გამოიყენებს, რითაც ავსტრიულ კომპანია „რედ ბულის“ მფლობელობაში არსებული ორივე საჯინიბოს მანქანები, ტექნიკურად ერთმანეთს დაუახლოვდება.

„ჩვენ გუნდს მიზანი ყოველთვის გაუმჯობესება არის და იქნება, რათა რაც შეიძლება მაღალ დონეზე ასპარეზობა შეძლოს. ამ ზამთარში ჩვენ ინტენსიურად ვიმუშავეთ იმისთვის, რომ რამდენიმე ორგანიზაციული ცვლილება გაგვეტარებინა. იმედი გვაქვს, რომ ამით იმ პრობლემების მოგვარებას შევძლებთ, რომლებიც ადრე წარმატებაში ხელს გვიშლიდა“, - ამბობს გუნდის შეფი ფრანც ტოსტი და დასძენს:

„ჩვენ ყველა პროცედურა გავაანალიზეთ, რათა გუნდის ძლიერი მხარეების ოპტიმიზაციისა და სუსტი მხარეების მინიმიზაციისთვის მიგვეღწია. სხვა გუნდებთან შედარებით, „ტორო როსოს“ გაცილებით ნაკლები თანამშრომელი ჰყავს, თუმცა „რედ ბულ ტექნოლოჯიზის“ შესაძლებლობებითაც ვსარგებლობთ, რაც ძალიან დაგვეხმარება. ახლა, როცა „რდ ბულიც“ „ჰონდას“ ძრავითაა ეკიპირებული, ჩვენ შევძლებთ, მეტი დრო დავუთმოთ დეტალებს. სწორედ დეტალებზე აქცენტირება იძლევა იმის საშუალებას, რომ უფრო სწრაფად განვითარება შევძლოთ“.

ტოსტის თქმით, ყველა კომპონენტი, რომლებიც „ჰონდას“ ძრავს უკავშირდება, „ტორო როსოს“ და „რედ ბულს“ ერთნაირი ექნებათ. ამასთან დასძენს, რომ დანარჩენი ნაწილების უმეტესობა, ახალ მანქანას ძველიდან გადმოჰყვა. ამის მიზეზი ისაა, რომ „ტორო როსო“ შესაძლებლობებით ნათესავი „რედ ბულისგან“ შორსაა.