ბათუმის ძალოსანთა ევროპის ჩემპიონატის საორგანიზაციო კომიტეტი აქტიურ მუშაობას განაგრძობს. მოგეხსენებათ, რომ აჭარაში იმყოფება ევროპის კომისია, რომელიც გუშინწინ სამუშაო ვიზიტის ფარგლებში ბათუმის სასტუმროებს გაეცნო, გუშინ კი საშეჯიბრო დარბაზი მოინახულა და დეტალები განიხილა.

ძალოსანთა კონტინენტის პირველობის საორგანიზაციო კომიტეტი, ეროვნული ფედერაციის პრეზიდენტის კახი კახიაშვილის ხელმძღვანელობით ჟურნალისტებს შეხვდა. პრესკონფერენციას საქართველოს განათლების, მეცნიერების, კულტურისა და სპორტის მინისტრის მოადგილე შალვა გოგოლაძე, აჭარის ავტონომიური რესპუბლიკის განათლების, კულტურისა და სპორტის მინისტრი ინგა შამილიშვილი და ბათუმის მერი ლაშა კომახიძე ესწრებოდნენ.

როგორც ევროპის ფედერაციის გენერალურმა მდივანმა ხასან აკუშმა განაცხადა, მიმდინარე სამუშაოებით კმაყოფილია და ბათუმში გასამართ ჩემპიონატს დადებითი შეფასება მისცა.
შეგახსენებთ, რომ ბათუმი კონტინენტის პირველობას 6-13 აპრილს უმასპინძლებს.
ევროპის ჩემპიონატის პირდაპირი ტელეტრანსლაცია “ევროსპორტზე” გადაიცემა და კონტინენტის პირველობას 60 მილიონიანი აუდიტორია ეყოლება, ასევე რეპორტაჟი იქნება “მატჩ TV”-ზე. საერთო ჯამში, პირდაპირი ეთერი 20 ენაზე 55 ქვეყანაში გაშუქდება. ევროპის ჩემპიონატს ქართული მედიაც აქტიურად გააშუქებს.

საქართველოს ძალოსნობის ფედერაციის პრესსამსახური