ფრანგულმა „ნანტმა“ დაკარგული ემილიანო სალას სანაცვლოდ „კარდიფს“ 15 მილიონ გირვანქა სტერლინგი მოსთხოვა. BBC-ის ცნობით, მიუხედავად იმისა, რომ არგენტინელი ფეხბურთელის თვითმფრინავმა კატასტროფა განიცადა და ჯერ მის ცხედარსაც ვერ მიაკვლიეს, ფრანგულმა მხარემ უელსელებს თანხის 10 დღის ვადაში გადახდის მოთხოვნა წაუყენა.
წინააღმდეგ შემთხვევაში „ნანტი“ სასამართლოში სარჩელს შეიტანს და „კარდიფს“ თანხის გადახდას აიძულებს.
ამავდროულად, „კარდიფ სიტიმ“ გაავრცელა განცხადება, რომლის მიხედვითაც ისინი კონტრაქტის ყველა დეტალს პატივსცემენ, მაგრამ მას შემდეგ გადაიხდიან დაკისრებულ თანხას, რაც სალას სამძებრო სამუშაოები დასრულდება.
გარდა ამისა, პრემიერლიგის ბინადრები გაკვირვებას გამოხატავენ ფრანგული მხარის საქციელით, რომელმაც ტრანსფერის ანაზღაურება იქამდე მოითხოვა, სანამ ემილიანოს ცხედარი იპოვეს.
შეგახსენებთ, ემილიანო სალა „ნანტიდან“ „კარდიფში“ ზამთრის სატრანსფერო პერიოდში გადავიდა. 21 იანვარს სწორედ საფრანგეთიდან უელსში მიფრინავდა, როდესაც თვითმფრინავი რადარებიდან გაქრა. ლაინერს ორი კვირის შემდეგ ლა მანშის სრუტეში მიაგნეს და ერთი ადამიანის ცხედარსაც იპოვეს, მაგრამ ჯერჯერობით დაუდგენელია არგენტინელი ფეხბურთელია თუ 59 წლის პილოტი დევიდ იბოტსონი.
