ფეხბურთი

11:52 | 31.01.2019 | ნანახია [] - ჯერ

ცრემლიანი ნანტი

იმას, რაც ოთხშაბათ საღამოს ნანტის „სტად დე ბოჟუარზე“ ხდებოდა, ძნელად თუ აღწერს კაცი. „ნანტი“ საფრანგეთის ჩემპიონატის 22-ე ტურის მატჩში „სენტ ეტიენს“ მასპინძლობდა, მაგრამ ვის ახსოვდა ფეხბურთი. „ნანტი“ ხომ პირველ შეხვედრას ატარებდა ლა-მანშზე გაუჩინარებული ყოფილი თანაგუნდელის, ემილიანო სალას გარეშე.

სტადიონის მისადგომებთან ქომაგებმა შარფები და ყვავილები დააწყვეს. „ნანტის“ ფეხბურთელებს მაისურებზე საკუთარის მაგიერ სალას გვარი ეწერათ.

თამაშზე „კარდიფის“ გულშემატკივრებიც ჩავიდნენ, სადაც არგენტინელი გადავიდა, მაგრამ უელსამდე ვეღარ ჩააღწია. გულისამაჩუყებელ ბანერზე ეწერა: „ჩვენ არასოდეს გვინახავს როგორ თამაშობ და როგორ გაგაქვს გოლები, მაგრამ ემილიანო, ჩვენი ბედნიერების ფრინველი ხარ („კარდიფის“ მეტსახელია) და ყოველთვის გვეყვარები.“

სტადიონის ტრიბუნები სალას ბანერებით იყო სავსე. მწვრთნელმა ვაჰიდ ჰალილჰოჯიჩმა კი თქვა: „ეს ყველაზე რთული მატჩი იყო ჩემს კარიერაში. ვამაყობ ჩემი ფეხბურთელებით. ვამაყობ გულშემატკივრების თანადგომით. არასოდეს დავივიწყებთ ემილიანოს. ის ძალიან კარგი ბიჭი იყო. მაგრამ, ცხოვრება გრძელდება და ვიმედოვნებ, „ნანტის“ მოთამაშეები კიდევ შეძლებენ სახეზე ღიმილი დაიბრუნონ.“

ამასობაში, „ნანტის“ ოფიციალურ ვებგვერდზე საგანგებოდ დამზადებული მაისურები იყიდება, საიდან შემოსული თანხაც, მთლიანად სალას სამძებრო სამუშაოებს მოხმარდება.

ჰო. მატჩი 1:1 დამთავრდა.

Loading...
0.139092