ესპანურ „სარაგოსაში“ გიორგი პაპუნაშვილის თანაგუნდელმა ალვარო ვასკესმა გუშინ „ოვიედოსთან“ მატჩში დუბლი შეასრულა და საკუთარ გუნდს მნიშვნელოვანი გამარჯვების მოპოვებაში დაეხმარა (2:0).

ვასკესს ამ მატჩამდე გოლი 11 ნოემბრის შემდეგ არ ჰქონდა გატანილი. 17 შეხვედრაში 4 გოლი კი, არ იყო ის შედეგი, რის გამოც გასულ ზაფხულს „სარაგოსამ“ ბარსელონას „ესპანიოლიდან“ ინათხოვრა. თუმცა, ვასკესი „ოვიედოსთან“ შესანიშნავად თამაშობდა, 76-ე და 90-ე წუთებზე გატანილი გოლებით „ლა რომარედაზე“ მყოფი 18 ათასი ადამიანი ძალიან გაახარა.

განსაკუთრებით ლამაზი გამოდგა მეორე გოლი. ვასკესმა ე.წ „მორიელის“ დარტყმით მოახერხა მეტოქის კარის დალაშქვრა და სწორედ ამის გამო ბევრი გამოცემის ყურადღება მიიპყრო. აღსანიშნავია, რომ ალვარომ გოლი მემფის დეპაის სტილში აღნიშნა და თუ რატომ გააკეთა ეს, მატჩის შემდეგ ახსნა:

„ასეთი ლამაზი გოლი არასდროს გამიტანია. ეს იყო საოცარი და ულამაზესი შესრულება. აღნიშვნა? - მინდოდა ამით მეთქვა, რომ არ უნდა მოუსმინო რას ამბობენ მოედნის მიღმა. მთავარია, რომ კონცენტრირებული იყო იმაზე, თუ რა ხდება მწვანე მინდორზე“, - თქვა ალვარო ვასკესმა.

აქვე გეტყვით, რომ ხსენებულ შეხვედრაში გიორგი პაპუნაშვილი ძირითად შემადგენლობაში გახლდათ და 63-ე წუთამდე ითამაშა. „სარაგოსამ“ ორივე გოლი ქართველი შემტევის მოედნიდან გასვლის შემდეგ გაიტანა.