სხვა

12:46 | 9.01.2019 | ნანახია [] - ჯერ

ზურაბ აბრამიშვილი: 2020 წლისთვის მკვეთრად მოვუმატებთ

ხელბურთის ეროვნული ნაკრები ხვალ დილით მიემგზავრება მალტაში, ევროპის ჩემპიონატის პირველ საკვალიფიკაციო ეტაპზე სათამაშოთ. დღეს ბოლო ვარჯიშია, რომლის შემდეგაც მწვრთნელი ჯორჯე რაშიჩი 16-კაციან შემადგენლობას გამოაცხადებს. თუმცა, უკვე ცნობილია, რომ ბათუმის „შავი ზღვის ბიჭების“ 24 წლის მარცხენა გარემარბი ზურაბ აბრამიშვილი გუნდში იქნება. ის 2013 წლიდან თამაშობს ეროვნულ გუნდში.

— პირველად სანაკრებო შეკრებაზე 2012 წელს გამომიძახეს, უნივერსიადისთვის რომ ვემზადებოდით. საქართველოს ნაკრებმა იმ შეჯიბრებაში პირველი ადგილი დაიკავა. ის შეკრება დუშეთში ჩატარდა, თუმცა უშუალოდ უნივერსიადაზე მე არ წავუყვანივართ. პირველი შეხვედრა კი 2013 წელს პანევეჟისში, ლიტვასთან ჩავატარე და მას მერე სულ ნაკრებში ვარ. ერთადერთი, ისრაელში არ ვყოფილვარ, მსოფლიოს ჩემპიონატის შესარჩევში.

— ზურა, ხელბურთზე როდის მიხვედი?

— ალბათ 12 წლის ვიქნებოდი. დიდი სიმაღლით არ გამოვირჩეოდი, მაგრამ უქმად რომ არ ვყოფილიყავი მშობლებმა გადაწყვიტეს ხელბურთზე ვეტარებინეთ. ყველაფერი მარტივი მიზეზის გამო მოხდა — გლდანში ვცხოვრობთ და ხელბურთელთა დარბაზიც ჩვენი სახლის შორიახლოს იყო. ეს არის და ეს. ჩემი პირველი მწვრთნელი ჯიმშერ დვალიშვილი გახლდათ. შემდეგ ელზა მერაბიშვილი მავარჯიშებდა, შემდეგ იყო „ქარიშხალა“, რომელსაც ბექა ორჯონიკიძე და გიორგი ქობელაშვილი წვრთნიდნენ.

— უმაღლეს ლიგაში პირველად როდის გამოხვედი?

— სწორედ მაშინ, როდესაც „ქარიშხალა“ საქართველოს ჩემპიონატში ჩაერთო. უმაღლეს ლიგაში ჩემი დებიუტი „ქარიშხალას“ შემადგენლობაში შედგა. შემდეგ უკვე „სტუ-შევარდენში“ გადავედი და ბოლოს ბათუმის BSB-ში დავმკვიდრდი.

— ბათუმში რომელი წლიდან თამაშობ?

— 2014 წლიდან .

— ყოველთვის ერთსა და იმავე ამპლუაში გამოდიოდი?

— თავიდან, ძალიან ცოტა ხანი, გამთამაშებელი ვიყავი, მაგრამ გარემარბად იმდენად მალე გადამიყვანეს, რომ ჩემი გამთამაშებლობა შეიძლება აღარც კი ვახსენოთ. მას მერე სულ მარცხენა კუთხეში ვთამაშობ.

— სიმაღლეში რომ გაიზარდე ინსაიდობა არავის შემოუთავაზებია?

— არა, ინსაიდობაზე არავის არაფერი უთქვამს. გარემარბად ბექა ორჯონიკიძემ დამაყენა და მას მერე სულ ამ პოზიციაზე ვთამაშობ. 193 სანტიმეტრი ვარ.

— ახლა, ის გვითხარი, მალტის შესარჩევი ტურნირის წინ რა ხდება, როგორ ემზადებით?

— ერთი რამ დანამდვილებით შემიძლია გითხრათ, ჯორჯე რაშიჩი ერთ-ერთი საუკეთესო მწვრთნელია, ვისთანაც ოდესმე მიმუშავია. ის ძალიან ინტენსიურ და საინტერესო ვარჯიშებს ატარებს. ჯორჯეს ხელში გუნდი კოლექტიურ ხელბურთს თამაშობს. კომბინაციებს ვამუშავებთ. ჯორჯე რაშიჩი რომ ძლიერი მწვრთნელია, ეს საქართველოში მისი პირველი ყოფნისას დამტკიცდა. ხომ გახსოვთ, როგორი ხელბურთი ათამაშა გუნდს და როგორი შედეგები ჰქონდა…

— შენი ანუ მარცხენა გარემარბის მონაწილეობით გაქვთ კომბინაციები დამუშავებული?

— როგორ არა. ჩარბენებია ჩემი… არის კომბინაციები, რომლებშიც ვმონაწილეობ, ზოგს ვაბოლოვებ.

— შანსებზე რას იტყვი?

— უეჭველად უნდა მიგოთ. ცოტა ხნის წინ ჩვენი კლუბი იყო ბაქოში ვიყავით და იქაური ჩემპიონატის მონაწილეთა ნაკრებს ვეთამაშეთ. ეს გუნდი აზერბაიჯანელებით არის დაკომპლექტებული და ერთი-ორი უცხოელით გაძლიერებული. მათ შორის უკრაინელი ინსაიდი დამამახსოვრდა. მერე გავიგე თითქოს კიდევ ვიღაცები დაუმატებიათ, თუმცა, კერძოდ ვინ, ამის შესახებ ვერაფერს გეტყვით.

— როგორი შთაბეჭდილება დატოვა აზერბაიჯანის ნაკრებმა?

— ვფიქრობ, აზერბაიჯანის ნაკრებს BSB ბათუმი მოუგებს. რაც შეეხება მალტას, როგორ ვიცი ამ კუნძულზე ხელბურთს მხოლოდ 1990-იანი წლების დასაწყისიდან თამაშობენ და მათ ჩვენ წინააღმდეგობა ვერ უნდა გაგვიწიონ. მათი ახალგაზრდული გუნდი კი ქუთაისში 2016 წელს IHF ტროფიზე ვნახეთ — ყველასთან დამარცხდა.

მნიშვნელოვანია, რომ ჩვენს გუნდში ყველა ლეგიონერი ჩამოსულია, ტრავმირებული არავინ არის. ვფიქრობ, დაცვაშიც კარგად ვდგავართ. პირადად მე მთელი ცხოვრება დაცვაშიც კუთხეში, ანუ პირველ კაცს ვთამაშობ, მაგრამ ჯერჯერობით საბოლოოდ მაინც არ ვიცი როგორ დააყენებს დაცვას ჯორჯე რაშიჩი.

— ევრო 2022-ის შესარჩევში ჩვენი მიზანი რა შეიძლება იყოს, მხოლოდ ამ ეტაპის დაძლევა თუ ფინალურ შეჯიბრებაში მოხვედრა?

— შემდეგი ეტაპები მალტის ტურნირთან შედარებით უფრო რთული იქნება, მაგრამ გამორიცხული არაფერია. რამდენადაც ვიცი, მეორე შესარჩევ საფეხურზე, პლეოფში მეტ-ნაკლებად ჩვენი დონის მეტოქეები შეგვხვდებიან, რომელთათვისაც ადრე მოგვიგია. აი, მესამე ეტაპზე კი ნებისმიერ გრანდს შეიძლება გადავეყაროთ, მაგრამ ყველა მათგანი ჩვენს ჯგუფში ხომ არ მოხვდება. ასე რომ, თუ გაგვიმართლებს არც ის არის გამორიცხული, რომ ევრო 2022-ზე გავიდეთ.

ჩვენს სასარგებლოდ მოქმედებს ისიც, რომ ლეგიონერებს ძალიან აქვთ მომატებული. ეტყობათ, მაღალი დონის ჩემპიონატებში რომ თამაშობენ. ერთი სიტყვით, დიდი შანსია, რომ 2020 წლამდე კიდევ უფრო გავძლიერდებით.

- უკვე კარგა ხანია, პროფესიონალი ხელბურთელი ხარ. კარიერის უცხოეთში გაგრძელებაზე არ გიფიქრია?

-კი. მქონია კიდეც შემოთავაზება თურქეთის სუპერლიგის კლუბიდან. მაგრამ იქაური გუნდები ფინანსური სტაბილურობით არ გამოირევიან. ამიტომაც უარი ვთქვი. ვფიქრობ, მექნება შანსი, უკეთეს ლიგაში მოვხვდე.

ზურაბ აბრამიშვილი: დაიბადა 1994 წლის 23 იანვარს. ხელბურთის თამაში დაიწყო 2006 წელს, გლდანის სპორტსკოლაში, ჯიმშერ დვალიშვილთან. კარიერა: ქარიშხალა (2010-12) - სტუ-შევარდენი (2012-14, საქართველოს ორგზის ჩემპიონი) - ბათუმის შავი ზღვის ბიჭები (2014-19, საქართველოს თასის მფლობელი და ორგზის ჩემპიონი) - ეროვნულ ნაკრებში პირველად ითამაშა 2013 წელს; სულ: 15 მატჩი, 3 გოლი

ხელბურთი. ევრო 2022. პირველი საკვალიფიკაციო რაუნდი. 11-13 იანვარი, 2019

მეორე ეტაპზე, პლეიოფში გადის ჯგუფის გამარჯვებული

A ჯგუფი, ლუქსემბურგში: ლუქსემბურგი, ბრიტანეთი, ირლანდია, ბულგარეთი

B ჯგუფი, მალტაში: კვიპროსი, საქართველო, აზერბაიჯანი, მალტა

კოსპიკვა, კოტონერას სპორტკომპლექსი

11 იანვარი. 20:00 კვიპროსი - აზერბაიჯანი, 22:30 საქართველო - მალტა,

12 იანვარი. 19:00 აზერბაიჯანი - საქართველო, 21:30 მალტა - კვიპროსი

13 იანვარი. 17:00 კვიპროსი - საქართველო, 19:30 აზერბაიჯანი - მალტაა

0.34471