ესპანური “ბასკონიას” ქართველი კაპიტანი თორნიკე შენგელია მოედანზე გასვლას მინიმუმ 3 თვის განმავლობაში ვერ შესძლებს. ეს სამწუხარო ამბავი მცირე ხნის წინ გახმაურდა.

“უკეთეს შემთხვევაში, სამ თვეში”, - ასე უპასუხა ბასკონიელთა მთავარმა მწვრთნელმა ველიმირ პერასოვიჩმა კითხვას, თუ როდის შესძლებს შენგელია მოედანზე გასვლას.

ესპანური გუნდის დამრიგებელს თოკოს შესახებ სტამბულში დაეკითხნენ, სადაც “ბასკონია” ევროლიგის ლიდერ “ფენერბაჰჩესთან” სათამაშოდ არის ჩასული და პასუხი ნამდვილად მოულოდნელი იყო.

საქმე ის გახლავთ, რომ თავდაპირველი ვერსიით, ქართველ კალათბურთელს მხოლოდ 3-4 კვირა იძულებით უქმობა ელოდა, ახლა კი, როგორც სჩანს, სიტუაცია დამძიმდა.

შეგახსენებთ, რომ შენგელია ესპანეთის ლიგა ენდესაში მადრიდის “რეალთან” მატჩში დაშავდა და ახალი ვითარების თანახმად, ფაქტობრივად, ევროლიგის მთელს რეგულარულ სეზონს გამოტოვებს, ამას გარდა, ჩვენებურს ვერც ესპანეთის თასზე ვიხილავთ, რომელიც თებერვალშია დაგეგმილი.

ევროლიგის მიმდინარე სეზონში თორნიკეს საშუალო მონაგარი 12.7 ქულა, 4.5 მოხსნა და 2.0 პასი გახლდათ.