ინტერნეტ გამოცემა „მოტორსპორტის“ ინფორმაციით, „რენოს“ ფორმულა 1-ის ძრავების ინჟინრებმა, აგრეგატის სიმძლავრის 50 ცხენის ძალით გაზრდა მოახერხეს. ამ ძრავს ფრანგული კომპანია საკუთარ და პარტნიორ გუნდებს ახალ სეზონში მიაწვდის.

მომავალი სეზონი მეოთხეა მას შემდეგ, რაც „რენო“ ფორმულა 1-ის მსოფლიო ჩემპიონატში, საკუთარი გუნდით დაბრუნდა. ამ დროის განმავლობაში, ძირეულად შეიცვალა გუნდის სტრუქტურა და ენსტოუნის (ბრიტანეთი) ტექნიკური ბაზა. გაიზარდა შტატი.

„მოტორსპორტის“ მიერ მოპოვებული ინფორმაციით, სიმძლავრის მატება სასტენდო გამოცდების დროს დადასტურდა. 50 ცხენის ძალით სიმძლავრის გაზრდა შესაძლოა საკმარისი არცაა იმისათვის, რომ „რენო“ ლიდერ „მერსედესს“ და „ფერარის“ დაეწიოს. მითუმეტეს, ახალი სეზონისთვის სიახლეებს ისინიც ამზადებენ. თუმცა შეიძლევა იმის თქმა, რომ სიმძლავრეებს შორის სხვაობა შემცირდება.

„რენოს“ მოდიფიცირებული ძრავის სიმძლავრის ზრდაზე უკვე ილაპარაკა „მაკლარენის“ შეფმა ზეკ ბრაუნმა. მისი თქმით, „რენოს“ ძრავების ინჟინრებმა, აგრეგატის ახალ ვერსიას „ბევრი კილოვატი დაუმატეს“. სხვათა შორის, „რედ ბულის“ შეფ კრისტიან ჰორნერს ნათქვამი აქვს, რომ გასულ სეზონში, დამატებითი 50 ცხენის ძალა ბევრ რამეს შეცვლიდა.

სიმძლავრის ზრდის გარდა, აგრეგატისთვის ძალიან მნიშვნელოვანია გამძლეობა - გუნდებს ერთ სეზონში სამ ძრავზე მეტის გამოყენების უფლება არ აქვთ და თუ ამ წესს დაარღვევენ, მათ პილოტებს სტარტზე პოზიციების დათმობა მოუწევთ. „რენო“გასულ სეზონებში, ამ კომპონენტშიც მოიკოჭლებდა. სიმძლავრის ზრდას კი აგრეგატის სამუშაო რესურსის შემცირება შეუძლია. და თუ ასე მოხდა, ინჟინრებს სიმძლავრის შეზღუდვა მოუწევთ...