მადრიდის „ატლეტიკოს“ პრეზიდენტი ენრიკო სერეზო ჩემპიონთა ლიგის მერვედფინალში თავისი გუნდის მეტოქის, „იუვენტუსის“ შესახებ საუბრობს. მისი განცხადებით, „როხიბლანკოსთვის“ „ბებერი სინიორა“ ყველაზე რთული მეტოქე იქნება, მაგრამ „ატლეტიკოს“ მისი დამარცხება შეუძლია.

სერეზოს აზრით, ამ წყვილში გამარჯვებული ჩემპიონთა ლიგის ფინალში გასვლასაც მოახერხებს.

„ატლეტიკო“ „იუვენტუსისთვის“ ყველაზე ცუდი მეტოქეა? - ესპანეთში ამბობენ, რომ „იუვენტუსი“ „ატლეტიკოსთვისაა“ ყველაზე რთული მოწინააღმდეგე. „იუვენტუსი“ ერთ-ერთი საუკეთესო გუნდია, მაგრამ ჩვენ გვჯერა, რომ ამ ბარიერს დავძლევთ. ამ გუნდებს შორის დიდი პატივისცემაა, ანდრეა ანიელისთან ძალიან კარგი ურთიერთობა გვაქვს. ჩვენს გამარჯვებული ვფიქრობ, ფინალში ითამაშებს. იმედია ეს ჩვენ ვიქნებით.

კრიშტიანუ რონალდუს წინააღმდეგ არაერთხელ გვითამაშია და კარგად ვიცნობთ. პატივს ვცემთ, მაგრამ არ გვეშინია. საოცარი, ბრწყინვალე ფეხბურთელია, რასაც „იუვენტუსში“ ამტკიცებს. არის თუ არა საუკეთესო? - კრიშტიანუ მესისთან, გრიზმანთან, ნეიმართან და მბაპესთან ერთად მსოფლიოს ხუთ საუკეთესო ფეხბურთელში შედის. რონალდუ ლიდერი იყო ყოველთვის „მანჩესტერში“, „რეალში“ და ახლა „იუვენტუსში“, - თქვა სერეზომ.

შეგახსენებთ, რომ „იუვენტუსი“ და „ატლეტიკო“ ჩემპიონთა ლიგის მერვედფინალში დაუპირისპირდებიან ერთმანეთს.