გასულ კვირას “მანჩესტერ იუნაიტედში” დიდი ამბები მოხდა. მთავარ მწვრთნელ ჟოზე მოურინუს კარისკენ მოიუთითეს და მის მაგიერ ნორვეგიიდან გუნდის ლეგნდა, ოლე გუნარ სოლსკიაერი დააბრუნეს.

სოლსკიაერის პრემიერლიგური დებიუტი ფანტასტიკური გამოდგა. სტუმრად, “კარდიფს” ხუთი ბურთი გაუტანეს (“იუნაიტედმა” 5:1 მოიგო), მაგრამ მარტო გოლებში არ იყო საქმე. ასეთი კარგი თამაში დიდი ხანია აღარ უჩვენებიათ „ეშმაკუნებს“ მაყურებლისთვის. ამდენი გოლიც, „იუნაიტედს“ ბოლოს პრემიერლიგაში 2013 წლის მაისში, ალექს ფერგიუსონის ეპოქაში, „ვესტ ბრომვიჩისთვის“ გაეტანა.

ალექს ფერგიუსონი ვახსენეთ და The Sun-ის ცნობით, სწორედ „ეშმაკი ფერგი“ ყოფილა ნორვეგიელის დაბრუნების ინიციატორი. ახლა კი კლუბში კონსულტანტად ბრუნდება. გამოცემა წერს, რომ სოლსკიაერს ყოფილ დამრიგებელთან მუდმივი კონტაქტი ექნება.

ფერგის დამსახურებაა მისი ყოფილი თანაშემწის, 56 წლის მაიკ ფელანის გუნდში დაბრუნებაც. ფერგიუსონმა ახლახან ინსულტი გადაიტანა და სრული სამუშაო საათებით არ დაიტვირთება, თუმცა ყოვედღიურად დაარიგებს ახალ მწვრთნელს. მას მიაჩნია, რომ სოლსკიაერი და ფელანი შეძლებენ გუნდის კრიზისიდან გამოყვანას.

კლუბის დირექტორი, ედ ვუდვორდი, რომელსაც განსაკუთრებით დაძაბული ურთიერთობა ჰქონდა მოურინიუსთან, არა-ერთხელ ესაუბრა კლუბის მფლობელ გლეიზერებს პორტუგალიელის გათვისუფოლების შესახებ. თუმცა, 2016 წელს, ლუი ვან გაალის შემცვლელად ჟოზეს მიყვანისას, ფერგიუსონისთვის რჩევის კითხვა არ გახსენებია. მოგეხსენებათ, ფერგიუსონი, ბობი ჩარლტონი და დევიდ ჯილი „იუნაიტედის“ მმართველი გუნდის საპატიო წევრები არიან.

ახლა კი ვითრება შეიცვალა. ფერგი ისევ ბრუნდება. ამჯერად, კონსულტანტად.

დაბოლოს, ლეგენდარული „მანჩესტერის“ მეკარეს, პეტერ შმაიხელსაც გამოუთქვამს კლუბში დაბრუნების სურვილი. საფეხბურთო საქმეების დირექტორად. მოკლედ, ძველი გუნდი ნელ-ნელა ბრუნდება.