8-9 დეკემბერს, რუსეთის ქალაქ ვლადიკავკაზში ჭიდაობის მსოფლიო გაერთიანების ეგიდით საერთაშორისო ტურნირი “ალანები-2018” გაიმართება, სადაც იქვე აშშ-ს და რუსეთის ნაკრებთან ერთად საერთო შეკრებაზე მყოფი საქართველოს თავისუფალი სტილით ნაკრებიც იასპარეზებს.

საქართველოს ჭიდაობის ფედერაციის პრესსამსახურის ცნობით, ტურნირზე საკმაოდ ძლიერი შემადგენლობა მოიყრის თავს. მონაწილეობას 15 ქვეყანა აპირებს. მათ შორის არიან წამყვანი საჭიდაო ნაკრებები: რუსეთი, აშშ, ირანი, აზერბაიჯანი, თურქეთი.
რუსებისთვის ეს შეჯიბრი მთავარი შესარჩევი ეტაპი იქნება ივან იარიგინის 2019 წლის სარეიტინგო გრან-პრისთვის. შესაბამისად, მათი მხრიდან უკლებლივ ყველა ძლიერი ფალავანი გამოვა. ასევე გაძლიერებული შემადგენლობითაა ჩასული ირანის ნაკრებიც, რომელსაც 2-გზის მსოფლიოს ჩემპიონი რეზა იაზდანი (97 კგ.) უხელმძღვანელებს.
საქართველოს ნაკრები ტურნირზე ოლიმპიური ჩემპიონის ლადო ხინჩეგაშვილისა და მსოფლიოს მოქმედი ჩემპიონის – მძიმეწონოსანი გენო პეტრიაშვილის ლიდერობით იჭიდავებს.
ტურნირის საპრიზონ ფონდი ასეთია: თითოეულ წონით კატეგორიაში გამარჯვებული 5 000 დოლარს მიიღებს, მეორე ადგილოსანი – 2 000 დოლარს, ხოლო ბრინჯაოს პრიზიორები 1000-1000 დოლარს.

საქართველოს ნაკრები:
57 კგ. – ბექა ბუჯიაშვილი, ოთარ გოგავა, გიორგი ღონიაშვილი
61 კგ. – ბექა ლომთაძე, გიორგი რევაზიშვილი
65 კგ. – ვლადიმერ ხინჩეგაშვილი, ედემი ბოლქვაძე
70 კგ. – კოტე ხაბალაშვილი, ლევან ქელეხსაშვილი, რამაზან მალაკოევი
74 კგ. – გიორგი სულავა
79 კგ. – დავით ხუციშვილი
86 კგ. – სანდრო ამინაშვილი
92 კგ. – დავით მარსაგიშვილი, ირაკლი მწითური
97 კგ. – ელიზბარ ოდიკაძე, ზურიკო ურთაშვილი
125 კგ. – გენო პეტრიაშვილი

7-9 დეკემბერი, ვლადიკავკაზი
საერთაშორისო ტურნირი “ალანები-2018
7 დეკემბერი
17:00 – კენჭისყრა, აწონვა (+2კგ)

8 დეკემბერი
12:00 – წინაწარი და ნახევარფინალური ეტაპის შეხვედრები ყველა წონით კატეგორიაში

9 დეკემბერი
12:00 – დამამშვიდებელი წრის შეხვედრები
15:00 – ბრინჯაოს მედლისათვის შეხვედრები
18:00 – გახსნის ცერემონია
18:30 – ფინალური შეხვედრები, დაჯილდოვება