ეპიზოდი გიორგი შერმადინის მონაწილეობით, საკალათბურთო ევროთასის მორიგი სათამაშო დღის საუკეთესო მომენტად აღიარეს.

შეგახსენებთ, რომ შერმადინის “უნიკახა” D ჯგუფის ეგიდით მონტენეგროს წარმომადგენელ “მორნარ ბარს” დაუხვდა და 113:76 გაანადგურა, ქართველი ცენტრი კი გამორჩეული ფიგურა გახლდათ.

მატჩის მე-3 მეოთხედის შუაწელს ხაიმე ფერნანდესმა ბურთი ჩაჭრა და ის ფარიდან ასხლეტითჱგიოს მიაწოდა, რასაც ქართველი ლეგიონერის ლამაზი “სლემ-დანქი” მოჰყვა.

სათქმელია, რომ ჩვენებური ამ ეპიზოდის გარდაც ყურადღების ცენტრში იყო. გიორგი სასტარტო ხუთეულში გამოჩნდა და მართალია, მატჩის მიმდინარეობიდან გამომდინარე, პარკეტზე მხოლოდ 14:24 წუთი გაატარა, მაინც საუკეთესო ბომბარდირი გახდა.

ქართველმა ლეგიონერმა 10-დან 8 ორქულიანი და 6-დან 3 საჯარიმო ჩააგდო და 19 ქულას 4 მოხსნა, 1 პასი და 2 ჩაჭრა წაამატა. შერმადინს ერთხელ დაუფარეს, არ დაჯარიმებულა, მის წინააღმდეგ კი თამაშის წესები 4-ჯერ დაირღვა.
შედეგად, ჩვენებური სარგებლიანობის კოეფიციენტი 24-ს გაუტოლდა და ის მხოლოდ ფინელ თანაგუნდელ სასუ სალინს (25) ჩამორჩა, რომელმაც 17 ქულას 7 მოხსნა წაამატა.

ესპანურმა გუნდმა 8 ტურში 7 მოგება მოაგროვა და ჯგუფს რუსულ “უნიკსთან” ერთად ლიდერობს, რომელსაც უკვე სანაკრებო პაუზის მერე, 12 დეკემბერს, ყაზანში ეთამაშება.