თორნიკე შენგელიას “ბასკონიამ” ესპანეთის ჩემპიონატის მე-9 ტურში “გრან კანარია” 91:76 დაამარცხა, ქართველი კალათბურთელი კი, რომელსაც მატჩის წინ, ოქტომბრის საუკეთესო მოთამაშისთვის კუთვნილი პრიზი გადაეცა, ამჯერადაც გამორჩეული იყო.

შეგახსენებთ, რომ ქართველი ფორვარდი გასულ თვეში საშუალოდ 15.5 ქულას, 4.1 მოხსნასა და 3.0 პასს აგროვებდა, მისი სარგებლიანობის კოეფიციენტი კი 19.8 იყო, რაც ვერავინ გადაფარა.
დღევანდელ შეხვედრაში თოკო სასტარტო ხუთეულში გამოჩნდა და 27:14 წუთში 16 ქულა, 5 მოხსნა, 5 პასი და 1 ჩაჭრა მოაგროვა.
შენგელიამ 10-დან 6 ორქულიანი და 5-დან 4 საჯარიმო ჩააგდო, სამქულიანი ააცილა, ბურთი 4-ჯერ დაკარგა, 2 პერსონალური ფოლი მიიღო, მის წინააღმდეგ კი 7-ჯერ დაჯარიმდნენ.
შედეგად, ქართველი ლეგიონერის სარგებლიანობის კოეფიციენტი 22-ს გაუტოლდა და ეს თამაშის საუკეთესო მაჩვენებელი იყო.

საქართველოს ნაკრების ნატურალიზებულმა ამერიკელმა კალათბურთელმა მეტ ჯენინგმა მოედანზე 26:36 წუთი დაჰყო, 7-დან 3 ორქულიანი და 8-დან 3 სამქულიანი 15 ქულას 2 მოხსნა და 2 ჩაჭრა წაამატა.
“ბასკონიამ”, რომელსაც ამ მატჩის წინ, მთავარ მწვრთნელად ვლადიმირ პერასოვიჩი დაუბრუნდა, 7 მოგება და 2 მარცხი მოაგროვა და გიორგი შერმადინის “უნიკახასთან” ერთად, მესამე-მეოთხე ადგილებს ინაწილებს.
თოკოს გუნდს მომდევნო მატჩი 25 ნოემბერს, სტუმრად, “მონბუს ობრადოიროსთან” ელის.