სხვა

14:12 | 9.11.2018 | ნანახია [] - ჯერ

ტოჩინოშინის მეტოქეთა ვინაობა ცნობილია

იაპონიის სუმოს ასოციაციამ მოახლოებული კიუშიუ ბაშოს საწყისი დღეების განრიგი გამოაქვეყნა, რომლის თანახმადაც ქართველი სეკივაკე ლევან გორგაძე იგივე ტოჩინოშინი პირველ ორთაბრძოლას ტამავაშისთან გამართავს.

შეგახსენებთ, რომ ტოჩინოშინი ნოემბრის სუპერტურნირზე დასავლეთის მე-2 ოძეკის წოდებით გაირჯება, მონღოლი ტამავაში კი აღმოსავლეთის მე-2 მაეგაშირაა, ამდენად, შო-ნიჩის (ბაშოს სასტარტო დღე) ჩვენებური ფავორიტის რანგში ხვდება.

ლევანი მონღოლს, რომელიც მომავალ კვირას 34 წლის ხდება, 24-ჯერ დაპირისპირებია და აქტივში 16 გამარჯვება აქვს.
ცნობილია ისიც, რომ კიუშიუ ბაშოს მე-2 დღეს ქართველი გოლიათი აღმოსავლეთის მე-3 მაეგაშირა ნიშიკიგის გაეჯიბრება, რომელიც სამიდან ორ შეხვედრაში ჰყავს დამარცხებული.

კიუშიუ ბაშოს რანგით მე-3 დივიზიონ მაკუშიტაში ხვდება გაგამარუს შიკონათი ცნობილი თეიმურაზ ჯუღელი, თუმცა, პირველ შერკინებას ის მე-2 დივიზიონ ჯურიოში ჩაატარებს. კვირას, ქართველი სუმოისტის მეტოქე იაპონელი ტომოკაძე იქნება, რომელთანაც ჩვენებური გასულ ბაშოზე დამარცხდა.
შეგახსენებთ, რომ მოახლოებულ შეჯიბრში მონაწილეობას ვერ მიიღებენ მონღოლი იოკოძუნები – ჰაკუჰო და კაკურიუ, ბოლო წამს კი ბაშოს ბრაზილიელი კომუსუბი კაისეიც გამოაკლდა. სხვა საქმეა, რომ თუკი ამ უკანასკნელმა მარცხენა ფეხის ტრავმა მოიშუშა, ტურნირს მოგვიანებით შეუერთდება.
შეგახსენებთ, რომ მომავალ სუპერტურნირს 11-25 ნოემბერს “ფუკუოკა კოკუსაი სენთერი” უმასპინძლებს.

0.142803