ბერძნულ პორტო კარასში დასრულებულ ახალგაზრდულ ევროპის ჩემპიონატზე მედლის მოპოვება ორმა ქართველმა მოჭადრაკემ მოახერხა: 14-წლამდე ვაჟებში ნიკოლოზ კაჭარავამ (2373) ვერცხლი აიღო, ხოლო 16-წლამდელებში ნიკოლოზ პეტრიაშვილმა (2343) ბრინჯაო დაისაკუთრა.

კაჭარავამ დასკვნით მე-11 ტურში შავი ფიგურებით ინდოელი რიტვიკ რაჯა შავი ფიგურებით დაამარცხა, 9.0 ქულა მოაგროვა და ჩემპიონობასთან ძალიან ახლოს იყო, თუმცა, შავებითვე გამარჯვება იზეიმა ესპანელმა პედრო ანტონიო გინეს ესტეომ (2288), რომელმაც ჩვენებურს დამატებითი მაჩვენებლებით აჯობა.
აუცილებლად უნდა ითქვას, რომ საერთო აზრით, გინეს ესტეოსა და ალექსანდერ კრასტევის შეხვედრაში სერიოზული სპორტული დანაშაული მოხდა. გერმანელმა მოჭადრაკემ აშკარა საყაიმო პოზიციაში ძალიან უხეში შეცდომა დაუშვა, პარტია წააგო და ესპანელს პირველ ადგილზე გასვლის საშუალება მისცა. ამ წუთებში ქართულ დელეგაციას ტურნირის საორგანიზაციო კომიტეტში საპროტესტო ნოტა შეაქვს...
გამოსარჩევია პეტრიაშვილის კარგი თამაშიც, რომელსაც მხოლოდ 31-ე განთესვა გააჩნდა, თუმცა, 8.0 ქულით მესამე-მეექვსე ადგილები გაინაწილა, დამატებითი მაჩვენებლებით კი, ბრინჯაოს მედალი ერგო. დასკვნით ტურში ნიკოლოზმა შავი ფიგურებით ბელარუს ვიაჩასლაუ ზარუბიცკის (2417) მოუგო, რეიტინგში 51.8 ქულა მოიმატა და საერთაშორისო ოსტატის ნორმაც შეასრულა. ვთქვათ ისიც, რომ ამ კატეგორიაში ჩემპიონი კი სომეხ შანტ სარგსიანი (2463) გახდა 9.0 ქულით.
14-წლამდე გოგონებში დიანა ლომაიამ (1876) 5.5 ქულით 61-ე შედეგი აჩვენა, 16-წლამდელთა ტურნირში კი თამარ ესაძე (1911) 5.5 ქულით 47-ე იყო. 18-წლამდე ვაჟებში ნიკოლოზ ცომაიამ (2201) 6.5 ქულით 28-ე შედეგი დააფიქსირა, ხოლო გოგონებში მარიამ ჯანაშვილმა (2081) 6.5 ქულით მე-19 ადგილი დაიკავა.