ესპანურმა “ბასკონიამ”, რომლის ღირსებასაც საქართველოს ეროვნული ნაკრების კალათბურთელები თორნიკე შენგელია და მეტ ჯენინგი იცავენ, მორიგი დამაჯერებელი გამარჯვება იზეიმა.
ესპანური ACB ლიგის მე-4 ტურში ბასკური კლუბი “ფუენლაბრადას” ესტუმრა და 50 ქულის სხვაობით – 110:60 გაანადგურა.
საქართველოს ნაკრების წევრები თამაშში სათადარიგოთა სკამიდან ჩაერთვნენ, ჯამში 21 ქულა ჩააგდეს და საინტერესოა, რომ ზუსტად მხოლოდ სამქულიანები ესროლეს.
შენგელიამ მოედანზე 19:14 წუთი გაატარა და 9 ქულა, 2 მოხსნა და 3 პასი მოაგროვა. თორნიკემ 4-დან 3 სამქულიანი ჩააგდო, 2 ორქულიანი ააცილა, ბურთი ერთხელ დაკარგა და მის წინააღმდეგ ერთხელ დაჯარიმდნენ.
თავის მხრივ, ჯენინგმა 8-დან 4 სამქულიანი გამოიყენა, ორქულიანი კი ააცილა და 12 ქულას 1 პასი წაამატა. მეტმა 1 პერსონალური ფოლი მიიღო და მასზეც ერთხელ დაჯარიმდნენ.
“ბასკონიამ” ოთხ ტურში მე-3 გამარჯვება იზეიმა და სატურნირო ცხრილში მხოლოდ “ბარსელონასა” და “რეალს” ჩამორჩება. ესპანური კალათბურთის უმთავრეს გრანდებს ასპროცენტიანი შედეგი აქვთ.
შენგელიას და ჯენინგის გუნდი ესპანეთის ჩემპიონატში მომდევნო მატჩს 21 ოქტომბერს, შინ, “მურსიასთან” გამართავს.