არგენტინაში საქართველოს საგანგებო და სრულუფლებიანი ელჩის ირაკლი ყურაშვილის მიწვევით, 11 ოქტომბერს ბუენოს აირესში საქართველოს საელჩოს სტუმრობდნენ საქართველოს ოლიმპიური დელეგაციის ხელმძღვანელები - ეროვნული ოლიმპიური კომიტეტის პრეზიდენტი ლერი ხაბელოვი, პირველი ვიცე-პრეზიდენტი ელგუჯა ბერიშვილი, გენერალური მდივანი ემზარ ზენაიშვილი, განათლების, მეცნიერების, კულტურისა და სპორტის მინისტრის მოადგილე შალვა გოგოლაძე, სამინისტროს სპორტის დეპარტამენტის უფროსი ირაკლი დოლაბერიძე, კალათბურთის ფედერაციის პრეზიდენტი პაატა გურასპაული, სეოკ-ის პარტნიორის - საქართველოს ბანკის წარმომადგენელი ეკატერინე ლილუაშვილი.

ელჩმა სტუმრებს გააცნო საელჩოს საქმიანობა, საქართველოს დამოუკიდებლობის 100 წლისთავისადმი მიძღვნილი გამოფენის ექსპონატები, გასული საუკუნის 50-იან წლებში ბუენოს-აირესში, ქართველი ემიგრანტების მიერ გამოცემული გაზეთის - "მამულის" ნიმუშები. ითქვა, რომ ახალგაზრდული ოლიმპიური თამაშები ძალზე მნიშვნელოვანი სპორტული შეჯიბრებაა, რომლისთვისაც მთელი არგენტინა ემზადებოდა. ელჩმა კმაყოფილებით აღნიშნა, რომ ამ თამაშეზე საქართველო სოლიდური გუნდით არის წარმოდგენილი და უკვე შეძლო სამი მედლის მოპოვება.

სეოკ-ის პრეზიდენტმა მასპინძლებს გაუზიარა თამაშების მსვლელობისას მიღებული შთაბეჭდილებები, ასევე გაიხსენა ოთხი წლის წინანდელ ანალოგიურ ოლიმპიადაზე ქართველ სპორტსმენთა გამოსვლა და იქ ნაჩვენები შედეგები. აღინიშნა, რომ ოლიმპიადის დასრულებამდე თითქმის ერთი კვირა რჩება, თუმცა ჩვენმა სპორტსმენებმა, ისევე როგორც ჩინეთში, უკვე შეძლეს ორი ვერცხლისა და ერთი ბრინჯაოს მედლის მოპოვება. გამოითქვა იმედი, რომ საქართველოს დელეგაციის მონაგარი კიდევ უფრო გაიზრდება.

ლერი ხაბელოვმა დელეგაციის წევრების სახელით მადლობა გადაუხადა ელჩს გულისხმიერი მასპინძლობისთვის და სამახსოვრო საჩუქარი გადასცა.

www.geonoc.org.ge