კილიან მბაპე უბრალოდ შეუჩერებელია. ფრანგმა ვარსკვლავმა (და, არა ამომავალმა ვარსკვლავმა) საფრანგეთის ლიგა 1-ის მეცხრე ტურში ნამდვილი შოუ მოაწყო. არადა, პსჟ-ს ანგარიშგასაწევი მეტოქე ჰყავდა ერთი შეხედვით - "ლიონი". ის "ლიონი", ცოტა ხნის წინ "ეტიჰადზე" რომ ჩავიდა და პეპ გვარდიოლას "მანჩესტერ სიტი" მშრალზე რომ დატოვა.

მაგრამ, "სიტის" მბაპე არ ჰყავს. შესაძლოა, ჰყავდეს მომავალში ინგლისელთა ფინანსურ რესურსს თუ გავითვალისწინებთ (ამ მხრივ ისე არც პარიზელებს დაეწუნებათ რამე), მაგრამ ამჟამად ასეა. ჰოდა, კილიანი ჯერ პსჟ-შია და იქიდან აფრთხობს მეტოქეებს. "ლიონის" კარში მან ოთხი გოლი გაიტანა და ეს ყოველივე 13-წუთიან(!) ინტერვალში...

რა გასაკვირია, რეკორდებიც რომ დაამყარა. მაგალითად, მბაპე გახდა ლიგა 1-ის ბოლო 45 წლის ისტორიაში ყველაზე ახალგაზრდა ფეხბურთელი (19 წელი და 9 თვე), რომელმაც პოკერი შეასრულა. ამასთან, ხსენებული 45 წლის განმავლობაში ყველაზე სწრაფი პოკერის ავტორიც შეიქნა (13 წუთში).

თავის მხრივ, "პარი სენ ჟერმენმაც", რომელმაც "ლიონი" 5:0 გააცამტვერა, დაამყარა რეკორდი. კერძოდ, პარიზელები ლიგა 1-ის ისტორიაში პირველები არიან, რომლებმაც საწყისი 9 თამაშის მოგება მოახერხეს.