როგორც ჩანს, მილანის „ინტერი“ ნელ-ნელა ფერზე მოდის. მართალია, ლუჩანო სპალეტის გუნდს ისევ ძალიან გაუჭირდა და არ უჩვენებია ფეერიული ხარისხი, მაგრამ ფლორენციის „ფიორენტინა“ მაინც დაამარცხა.

საერთოდ, „იებთან“ ადვილი გასეირნება წელს არავის ელოდება და გამონაკლისი არც „ნერაძური“ ყოფილა. ზედიზედ მესამე გამარჯვება და ზედიზედ მესამედ ბოლო წუთებში. ამჯერად, არ ყოფილა გადამწყვეტი გოლები მსაჯის კომპენსირებულ წუთებზე, როგორც წინა ორ შემთხვევაში, მაგრამ დანილო დ’ამბროზიომ რომ გაიტანა, 77-ე წუთი იყო და ამ გოლს არაფერი მოასწავებდა.

იქამდე კი, 45-ე წუთზე მაურო იკარდიმ ვიდეორეფერის დახმარებით დანიშნული პენალტი გოლად აქცია და იტალიის ჩემპიონატის მიმდინარე სეზონში პირადი ანგარიში გახსნა. საერთოდ, მაურიტო მატჩის გმირი გამოდგა და ამაზეც გეტყვით. მეორე ნახევარის სტარტზე კი, ფედერიკო კიეზამ გაათანაბრა და საერთოდ, „ფიორენტინა“ მეორე ტაიმში ჩინებულად მოქმედებდა.

მიუხედავად ამისა, ბოლოს კონცენტრაცია დაკარგა სტეფანო პიოლის გუნდმა და დ’ამბროზიო გაეპარათ, რომელიც დიდებული პასით მეკარესთან პირისპირ იკარდიმ დატოვა და გოლს საგოლე პასი დაუმატა. საბოლოოდ, სპალეტის შეგირდებმა მოიგეს მძიმე ბრძოლაში, მაგრამ 10 ქულას მოუყარეს თავი და იმავე „ფიორენტინას“ გაუტოლდნენ.

სერია A-ს მეექვსე ტური ოთხშაბათს გაგრძელდება.

„ინტერი“ – „ფიორენტინა“ 2:1 (1:0)

გოლები: 1:0 იკარდი (45, პენ), 1:1 კიეზა (53), 2:1 დ’ამბროზიო (77)