საქართველოს ნაკრების მეკარემ გიორგი ლორიამ სამარის „კრილია სოვეტოვი“ დატოვა. აღნიშნული ინფორმაცია რუსული გუნდის ვებგვერდმა ოფიციალურად დაადასტურა.

„დღეს, გიორგი მოვიდა ბაზაზე, დაემშვიდობა თანაგუნდელებს და გუნდი დატოვა. „კრილია სოვეტოვი“ მადლობას უხდის გიორგის გაწეული სამსახურისთვის და მომავალ კარიერაში წარმატებებს უსურვებს“, - ნათქვამია კლუბის ოფიციალურ განცხადებაში.

32 წლის გიორგი ლორია „კრილიას“ 2015 წელს პირეოსის „ოლიმპიაკოსიდან“ შეუერთდა. 2015-2016 წლების სეზონში გუნდის შემადგენლობაში 15, ხოლო 2016-2017 წლების სეზონში 25 თამაში ჩაატარა. გასული სეზონი მან იჯარით მახაჩყალის „ანჟიში“ გაატარა, რომლის ღირსება პრემიერლიგაში 13-ჯერ დაიცვა და ისევ სამარაში დაბრუნდა, სადაც ძირითად შემადგენლობაში ვერ ხვდებოდა. როგორც თავად თქვა, არასაფეხბურთო მიზეზებით.

ლორიას ხსენებული „ოლიმპიაკოსის“, „კრილია სოვეტოვისა“ და „ანჟის“ გარდა, თბილისის „დინამოსა“ და „ოფის“ რიგებში უთამაშია. საქართველოს ნაკრებში კი 2008 წლიდან მოყოლებული 41 შეხვედრაში ითამაშა. ჯერჯერობით უცნობია თუ სად გააგრძელებს კარიერას ქართველი მეკარე.