პოლონური “არკასთვის” და ლუკა ზარანდიასთვის სეზონი წარმატებით დაიწყო – პოლონეთის სუპერთასი მოიგო, ხოლო ქართველმა გოლი გაიტანა. “ლეგიასთან” ნამატჩევს ზარანდიამ კომენტარი გააკეთა და აღნიშნა, რომ “არკა” პატარა გუნდია დიდი გულით.
გარდა ამისა, ლუკამ პოლონეთის ნაკრებში შესაძლო თამაშთან დაკავშირებით იხუმრა:
“კიდევ ერთხელ დავამტკიცეთ, რომ პატარა გუნდი ვართ დიდი გულით" - ციტირებს ლუკას სიტყვებს Canalplus.pl-ი. "დავამარცხეთ “ლეგია”, რომელიც დომინანატია და ყოველწელს ტიტულებს იგებს. ამიტომაც, ბედნიერები ვართ, რომ თასი გდინიაში წავიღეთ.
გოლის მომენტში ადამ მარჩინიაკმა კარგად ითამაშა ფლანგზე და ბევრი დრო მქონდა დასარტყმელად. ეს ჩემი სტილია. “არკაში” ყველამ ვიცით რა უნდა გავაკეთოთ მოედანზე და მადლობა მათ, რადგან გავიმარჯვეთ.
მსაჯი? ვფიქრობ, პენალტი იყო და ვცდილობდი მსაჯი ამაში დამერწმუნებინა, მაგრამ შეცდომა ყველა ადამიანს მოსდის (ზარანდია “ლეგიას” მეკარე არკადიუშ მალარჟმა წააქცია, თუმცა პენალტი არ დაინიშნა – რედ).
ეროვნულ ნაკრებში ბოლო ამხანაგური თამაშებისთვის მიწვეული ვიყავი, მაგრამ ტრავმის გამო ვერ დავეხმარე. თუმცა, ვიცი, რომ ჩემით მთავარი მწვრთნელი დაინტერესებულია. ისე, პოლონეთის პასპორტს თუ მომცემთ, პოლონეთისთვის ვითამაშებ”, - დაასრულა ხუმრობით ზარანდიამ.
შეგახსენებთ, ლუკა ზარანდია “არკაში” 2016 წლიდან მოყოლებული თამაშობს და ცოტა ხნის წინ, გუნდთან ახალი კონტრაქტიც გააფორმა. ამასთან, უთამაშია საქართველოს ყველა ასაკობრივ ნაკრებში, თუმცა ეროვნული გუნდის ღირსება ჯერ არ დაუცავს.
