იტალიის ჩემპიონი ტურინის “იუვენტუსი” იტალიის ნაკრებისა და “ჯენოას” მეკარე მატია პერინს დაიმატებს. იტალიური მედიის ცნობით, ყველაფერი გადაწყვეტილია, შეთანხმება შედგა ფეხბურთელსა და ტურინულ გრანდს შორის. ინფორმაციის ოფიციალურად დადასტურებას “ჯენოას” თანხმობა აკლია.
პერინი “იუვენტუსთან” 5-წლიან კონტრაქტს გააფორმებს და სეზონში ანაზღაურების სახით 2.5 მილიონ ევროს მიიღებს. რაც შეეხება “ჯენოას”, 25 წლის კაპიტნის სანაცვლოდ გენუელები 20 მილიონი ევროს ფარგლებში ითხოვენ.
აღსანიშნავია, რომ პერინისადმი ინტერესი უკვე დაადასტურა “ჯენოას” პრეზიდენტმა ენრიკო პრეციოზიმ და “იუვენტუსის” გენერალურმა დირექტორმა ჯუზეპე მაროტამ.
პერინი “იუვეს” ჯანლუიჯი ბუფონის შემცვლელად ესახება, რომელიც კარიერას ასრულებს. მართალია, ჯიჯის ჯერ ფეხბურთიდან წასვლის შესახებ ოფიციალურ განცხადება არ გაუკეთებია, მაგრამ 17 მაისს, სპეციალური პრესკონფერენციაა აქვს დაგეგმილი, სადაც ალბათ სწორედ კარიერის დასრულების შესახებ განაცხადებს. აქვე გეტყვით, რომ ბუფონი “იუვენტუსში” 2001 წლიდან თამაშობდა.
რაც შეეხება მატია პერინს – “ჯენოას” აკადემიის აღზრდილია და მთავარ გუნდში დებიუტი 2010 წელს ჰქონდა. 2011-2013 წლებში იჯარით “პადოვასა” და “პესკარაში” თამაშობდა, ხოლო 2013 წლიდან გენუელთა კარს უცვლელად იცავდა. საგულისხმოა ისიც, რომ 25 წლის კიპერს ლიგურიელებთან ხელშეკრულება 2019 წელს ეწურება და “ჯენოა” იძულებულია მიმდინარე წელს გაასხვისოს, რადგან სხვა შემთხვევაში ფეხბურთელს კლუბის უფასოდ დატოვება შეეძლება.
