ფეხბურთი

3:36 | 11.04.2018 | ნანახია [] - ჯერ

“სიტი” მეორე ტაიმში დანებდა (+VIDEO)

მეორე 1/4 ფინალურ წყვილში სასწაული აღარ მოხდა და შემდეგ ეტაპზე ის გუნდი ითამაშებს, რომელმაც პირველივე თამაშში უდიდესი უპირატესობა მოიპოვა. “ლივერპულმა” სამბურთიანი ჰანდიკაპი არა მხოლოდ შეინარჩუნა, არამედ გაზარდა – მეორე შეხვედრაშიც იმარჯვა.

თუმცა, მერსისაიდელთათვის შეხვედრას, უფრო სწორად კი პირველ ტაიმს იოლი ნამდვილად არ ეთქმის. მივყვეთ თანმიმდევრულად, ხოსეპ გვარდიოლამ გარისკა და სუპერ-შემტევი შემადგენლობა დააყენა. მოედანზე ერთბაშად იყვნენ: დე ბრუინი, დავიდ სილვა, ბერნარდო სილვა, სტერლინგი, სანე და ჟეზუსი, რაც არსებული ვითარებიდან გამომდინარე სწორი გახლდათ, რადგან “ქალაქელებს” სამბურთიანი ფორა ჰქონდათ ამოსაქაჩი.

მასპინძელთათვის შეხვედრა ძალიან იმედის მომცემად დაიწყო: მე-2 წუთზე ვან დეიკმა ბურთი საკუთარ ნახევარზე დაკარგა, რასაც “სიტის” უსწრაფესი შეტევა და გაბრიელ ჟეზუსის გოლი მოჰყვა. სტუმართა მოთამაშეები კი უკმაყოფილონი იყვნენ, რადგან მიაჩნდათ, რომ სტერლინგმა ვან დეიკს ხელი ჰკრა და ბურთი ისე ჩაიგდეს ხელში, მაგრამ მატეუ ლაოსი სხვაგვარად თვლიდა.

“სიტიმ” შეტევები განაგრძო და პირველ ტაიმში ძალიან დიდ უპირატესობასაც ფლობდა. რამდენჯერმე კარგი მომენტი შექმნეს და სტუმართა მსგავსად, პრეტენზიები მსაჯთან მათაც ჰქონდათ: მერსისაიდელთაგან ხელით თამაშის გამო პენალტის დანიშვნას ითხოვდნენ, მაგრამ ესპანელმა მსაჯმა ეს ეპიზოდიც გაატარა. ყველაზე საინტერესო კი ტაიმის უკანასკნელი ხუთი წუთი გახლდათ: 41-ე წუთზე ბერნარდო სილვას შორეული გასროლა ძელმა მოიგერია, ხოლო ერთ წუთში “სიტიმ” გოლი გაიტანა, მაგრამ ლეროი სანეს გოლი უსამართლოდ გაუქმდა: გვერდითმა მსაჯმა თამაშგარე მდგომარეობა დააფიქსირა. არადა, სანეს ბურთი მილნერისგან მიუვიდა და შესაბამისად, გოლი უნდა ჩათვლილიყო. “ლივერპულს” მთელი ტაიმი ბურთი არ ჰქონია, მოჰამედ სალაჰი ბევრს კი დარბოდა და აწუხებდა მცველებს, მაგრამ მათ შეცდომა არ დაუშვიათ და ეგვიპტელიც ფაქტობრივად უბურთოდ იყო. ასე გრძელდებოდა მთელი ტაიმი, მაგრამ 45-ე წუთზე სტუმრებსაც შეეძლოთ კონტრშეტევაზე გატანა: ოქსლეიდ-ჩემბერლენმა მეკარე ჩამოიშორა, მაგრამ მახვილი კუთხიდან კარს ააცილა.

მეორე ნახევარში კი, მალევე ყველაფერს აზრი დაეკარგა: დასარტყმელ პოზიციაზე გასულ სადიო მანეს ედერსონმა კი აჯობა, მაგრამ სალაჰი უმალ იქვე გაჩნდა, ბრაზილიელი კიპერი ჩამოიშორა, მსუბუქი დარტყმით შეაგდო და ორმატჩიანი რაუნდის ბედი საბოლოოდ გადაწყვიტა. დემორალიზებულმა “სიტიმ” ვეღარაფერი შეძლო, თამაშის ხალისი საერთოდ დაკარგა და აქეთ მეორე ბურთი გაუშვა: 77-ე წუთზე ნიკოლას ოტამენდი უხეშად შეცდა და ბურთი რობერტო ფირმინოს ჩააბარა, რომელიც საჯარიმოში შევიდა და ედერსონს შორეულ კუთხეში გაუტანა – 1:2.

“ლივერპული” ჩემპიონთა ლიგის ნახევარფინალში ათწლიანი პაუზის შემდგომ პირველად ითამაშებს.

მანჩესტერ სიტი – ლივერპული 1:2 (1:0)

მანჩესტერი, “ეტიჰად სთედიუმი”

მანჩესტერ სიტი (3-4-3): ედერსონი, ოტამენდი, ლაპორტე, უოლკერი, ფერნანდინიო, დე ბრუინი, დ.სილვა (აგუერო 66), ბ.სილვა (გიუნდოგანი 74), სტერლინგი, სანე, ჟეზუსი.
მწვრთნელი: ხოსეპ გვარდიოლა

ლივერპული (4-3-3): კარიუსი, ვან დეიკი, ლოვრენი, რობერტსონი, ალექსანდერ-არნოლდი (კლაინი 81), ვეინალდუმი, ოქსლეიდ-ჩემბერლენი, მილნერი, მანე, სალაჰი (ინგსი 89), ფირმინო (კლავანი 81).
მწვრთნელი: იურგენ კლოპი

გოლები: 1:0 ჟეზუსი (2), 1:1 სალაჰი (56), 1:2 ფირმინო (77)
გაფრთხილებები: ედერსონი, ბ.სილვა – მანე, ალექსანდერ-არნოლდი, ფირმინო, ვან დეიკი
მსაჯი: მატეუ ლაოსი (ესპანეთი)
ბურთის ფლობა: 64%-36%; დარტყმა: 20 (3)-5 (3); კუთხური: 9:2; ჯარიმა: 5:7; სეივი: 1:2

Loading...
სტატისტიკა
0.255818