მანუჩარ მარკოიშვილის “რეჯიო ემილია” ევროთასის ნახევარფინალში გავიდა. მეოთხედფინალური სერიის მესამე, გადამწყვეტი მატჩი რეჯიოემილიელებმა შინ სანკტ-პეტერბურგის “ზენიტს” 105:99 მოუგეს და ევროპის რანგით მეორე საკლუბო ტურნირის ოთხეულში მოხვდნენ.

სერიაში პირველი მატჩის შინ მოგების შემდეგ “რეჯიო ემილიამ” რუსეთში წააგო და მე-3, გადამწყვეტ მატჩს 14 მარტს უმასპინძლა. შეხვედრა დაძაბული გამოდგა და მისი ბედი ბოლო პერიოდში გადაწყდა, რომელიც მასპინძლებმა უკეთესად ჩაატარეს და დასკვნით ეპიზოდში განხორციელებული გაქცევით გამარჯვება მოიპოვეს.

მარკოიშვილი იტალიური კლუბის სასტარტო ხუთეულში გამოჩნდა და წარმატებაში დიდი წვლილი შეიტანა. მანუჩარმა მოედანზე 27:47 წუთი გაატარა და 9 ქულა, 5 მოხსნა, 3 პასი და 1 ჩაჭრა მიითვალა. ქართველმა ლეგიონერმა 6-დან 3 ორქულიანი და 2-დან 1 სამქულიანი ჩააგდო, ბურთი ერთხელ დაკარგა, 4 პერსონალური ფოლი მიიღო, მის წინააღმდეგ კი 2-ჯერ დაჯარიმდნენ. ამასთან, ჩვენებურმა დაცვაში უდიდესი სამუშაო გასწია.
“რეჯიო ემილიას” რიგებში ყველაზე შედეგიანები ამერიკელები – კრის რაიტი (25 ქულა, 6 მოხსნა, 5 პასი, 3 ჩაჭრა) და ჯულიან რაიტი (21 ქულა, 5 მოხსნა) და იტალიელი ამედეო დელა ვალე (20 ქულა) იყვნენ.

ევროთასის ნახევარფინალში მარკოიშვილის გუნდის მეტოქე კიდევ ერთი რუსული კლუბი, კრასნოდარის “ლოკომოტივი” იქნება, რომელმაც მეოთხედფინალიდან ესპანური “გრან კანარია” გააგდო. ნახევარფინალური სერიაც 2 მოგებამდეა და მატჩები 20 მარტს კრასნოდარში, 23-ში კი რეჯიო ემილიაში გაიმართება. საჭიროების შემთხვევაში, მე-3 გადამწყვეტ მატჩს რუსეთი უმასპინძლებს.

მეორე ნახევარფინალურ სერიაში თურქეთის “დარუშაფაკა” და გერმანული “ბაიერნი” ხვდებიან.

GBF.GE