ფეხბურთი

20:20 | 13.02.2018 | ნანახია [] - ჯერ

შეშლილი ჯიჯი!

ტურინის “იუვენტუსის” მეკარე ჯანლუიჯი ბუფონი, შესაძლოა, ფეხბურთში დარჩეს და ამავდროულად, იტალიის ნაკრებსაც დაუბრუნდეს. Sky Sport-ის ინფორმაციით, თითქმის გადაწყვეტილია, რომ ჯიჯი “სკუადრა აძურას” რიგებში იქნება მარტის თვეში არგენტინასთან და ინგლისთან გასამართ ამხანაგურ მატჩებში.

მაგრამ, ეს ყველაფერი არაა. წყაროს ცნობით, 40 წლის კიპერი სერიოზულად ფიქრობს კარიერის გაგრძელებაზე და მიზნად ევროპის 2020 წლის ჩემპიონატზე თამაშს ისახავს. თუ ჯიჯიმ ასეთი გადაწყვეტილება ოფიციალურად მიიღო, მაშინ მას საკლუბო საკითხი დარჩება მოსაგვარებელი.

ბუფონს “იუვენტუსთან” კონტრაქტი მიმდინარე სეზონის ბოლოს ეწურება და თუ კლუბმა ახალი ხელშეკრულება არ გაუფორმა, მაშინ ახალი გუნდის ძიება მოუწევს.

მიუხედავად ასაკისა, იტალიელი კვლავაც ჩინებულ ფორმაშია. 2017 წელს მსოფლიოს საუკეთესო მეკარედ დასახელდა და მიმდინარე სეზონსაც მშვენივარდ ატარებს. ორთვიანი იძულებითი უქმობის შემდეგ მოედანს ცოტა ხნის დაუბრუნდა და 4 მშრალი მატჩი ჩაატარა. თანაც, რამდენჯერმე საკუთარი გუნდი აშკარა გოლს გადაარჩინა. ვნახოთ, რას იზამს ჯიჯი...