ევროპა ლიგის მესამე ტურის მატჩში, რომელშიც ერთმანეთს “ევერტონი” და “ლიონი” ხვდებოდნენ, ინციდენტის გარეშე არ ჩაუვლია. საქმე ისაა, რომ ლივერპულელთა კაპიტან ეშლი უილიამსსა და სტუმართ კიპერ ენტონი ლოპესს შორის შელაპარაკება მოხდა, შემდეგ კი, საქმეში სხვა ფეხბურთელებიც ჩაერთვნენ.

ამაში უცნაური არაფერია და ბევრჯერ მომხდარა, მაგრამ საქმე სხვა რამეშია: ხსენებული ამბავი ტრიბუნასთან ძალიან ახლოს ხდებოდა, რითაც “ევერტონის” ერთ-ერთმა ქომაგმა ისარგებლა და “ლიონის” კარის დარაჯს დაარტყა კიდეც. საგულისხმოა ის ფაქტიც, რომ ინციდენტში მონაწილე გულშემატკივარს ხელში მცირეწლოვანი ბავშვი ჰყავდა...

როგორც Telegraph-ი იტყობინება, უეფა ამ ინციდენტის რეაგირების გარეშე დატოვებას არ გეგმავს. უეფას სადისციპლინო კომიტეტი მომხდარზე 16 ნოემბერს იმსჯელებს. ინგლისელ გულშემატკივარს რამდენიმე მატჩიანი დისკვალიფიკაცია ემუქრება.

გარდა ამისა, ინგლისური მედია კიდევ ერთ ცნობას ავრცელებს, რომლის მიხედვითაც, ურჩ გულშემატკივარს თავად “ევერტონი” დასჯის მკაცრად. კერძოდ, შესაძლოა “გუდისონ პარკზე” შესვლა სამუდამოდ აეკრძალოს.

რაც შეეხება უშუალოდ შეხვედრას, იგი “ლიონის” (2:1) გამარჯვებით დასრულდა.