"საბურთალოს" ლეგიონერი ვაგნერ გონსალვესი, რომელიც ერთწლიანი იჯარით ბელგიის პირველი დივიზიონის "სერკლ ბრიუგეში" ითამაშებს, ახალ კლუბს ნელ-ნელა ეგუება. ეროვნული ლიგის ერთ-ერთმა გამორჩეულმა შემტევმა ფეხბურთელმა ბელგიელთა შემადგენლობაში 3 გოლის გატანა უკვე მოასწრო.
ვაგნერ გონსალვესმა “საბურთალოს” პრესსამსახურთან ისუაბრა:
- უკვე ერთი თვეა ახალ კლუბში ვარჯიშობ, ნორმალურად მიმდინარეობს საწვრთნელი პროცესი. კარგად დამხვდნენ ბელგიელები, ნელ-ნელა კლუბს ვეცნობი. კონტრაქტი გავაფორმე, მალე ოფიციალურ შეხვედრებშიც მივიღებ მონაწილეობას. ახლა, შეკრებაზე ჰოლანდიაში ვიმყოფებით, სადაც პარალელურად ამხანაგურ მატჩებს ვმართავთ.
- ბოლო საკონტროლო შეხვედრა ინგლისის ჩემპიონშიპის "რედინგთან" გქონდათ. რთული იყო ბრიტანელების წინააღმდეგ თამაში?
- ინგლისის ჩემპიონატი გამორჩეულია მთელს მსოფლიოში, ისინი ძალიან მაღალ სისწრაფეებში თამაშობენ. მათ წინააღმდეგ ბოლო 30 წუთი ვითამაშე, რთული იყო თამაში, მაგრამ დიდი გამოცდილება მივიღე. საბოლოოდ შეხვედრა 1:1 დასრულდა.
- ვიდრე ბრიტანელებს დაუპირისპირდებოდით, მანამდე 2 ამხანაგური შეხვედრა გამართეთ, სადაც გოლებიც გაიტანეთ. გაიხსენეთ ის მატჩები?
- ორივე შეხვედრა ბელგიის კლუბებთან ჩავატარეთ. უმაღლეს ლიგელ "ლოკერენს" 2:1 ვაჯობეთ, "ოდენაარდს" კი 3:0 მოვუგეთ. აღნიშნულ შეხვედრებში სამი გოლი გავიტანე, რითაც ძალიან გახარებული ვარ. მთავარი ბრძოლები წინ გველის - 7 აგვისტოს ჩემპიონატი გვეწყება, პირველი შეხვედრა სტუმრად "ვესტერლოსთან" გვიწევს.
- თქვენს გარდა, სხვა ლეგიონერები თუ ირიცხებიან "სერკლ ბრიუგეში"?
- დიახ არიან, თუმცა ძირითადად საფრანგეთიდან ჭარბობენ.
- ერთი თვეა ბელგიელთა შემადგენლობაში ვარჯიშობთ და მათი სათამაშო სტილიც უცხო არ იქნება. როგორ თამაშს ანიჭებენ უპირატესობას?
- დაახლოებით ინგლისის ჩემპიონატის სტილია - ბევრი სივრცეები, სწრაფი თამაში, მაღალი ტემპი...
- რით განსხვავდება "საბურთალოსა" და "სერკლ-ბრიუგეს" ვარჯიშები?
- ბელგიაში დიდ ყურადღებას აქცევენ ფიზიკურ მომზადებას, პირველ რიგში აქცენტი ამ მიმართულებითაა გაკეთებული. რაც შეეხება "საბურთალოს" - თბილისურ კლუბში აქცენტი ტექნიკურ და სწრაფ ფეხბურთზეა გამახვილებული. ასევე, ბურთთან ხშირი კონტაქტი, რაც ძალიან მსიამოვნებს და მომწონს.
- თქვენს ყოფილ თანაგუნდელებთან ხშირად საუბრობთ?
- ძირითადად უფრო სოციალურ ქსელში. ფაქტობრივად, ყველასთან ვკონტაქტობ და ერთმანეთის ამბებს ვგებულობთ. "საბურთალოში" ყველასთან ვმეგობრობ და მათთან მხოლოდ თბილი და სასიამოვნო მოგონებები მაკავშირებს.
- თავისუფალი დროის გამონახვის შემთხვევაში, ხომ არ ფიქრობთ საქართველოში მცირე დროით ჩამოსვლას?
- ახლა, ჯერჯერობით გადატვირთული გრაფიკი მაქვს, თუმცა ჩემპიონატის დასრულების შემდეგ არ გამოვრიცხავ, რომ ასე მოხდეს. თბილისი ძალიან ლამაზი ქალაქია და იქ გატარებულ დროს, კარგად ვიხსენებ.
- "საბურთალოს" მატჩებს ადევნებთ თვალყურს?
- ამხანაგური შეხვედრების მომენტები ვნახე, ვუყურე კვირას "ტორპედოსთან" გამართულ მატჩი. გული დამწყდა, რომ გუნდმა წააგო, მაგრამ არაუშავს, წინ კიდევ ბევრი მატჩია და შედეგის გამოსწორება შესაძლებელია. ვისარგებლებ შემთხვევით და "საბურთალოს" მწვრთნელ-ფეხბურთელებსა და ხელმძღვანელობას მადლობას ვუხდი იმ ყველაფრისთვის, რაც მათ ჩემს მიმართ გასწიეს.
"საბურთალოს" პრესსამსახური
