24 მარტს საქართველო-სერბეთის შესარჩევი მატჩი გველის. ორქულიანი საქართველო რვაქულიანი მეტოქის წინააღმდეგ, რომელიც ბოლო წლებში საუკეთესო შესარჩევ ციკლს ატარებს. ყოველ შემთხვევაში, მუნდიალ-2010-ის შემდეგ, სერბები ფინალურ ეტაპზე არ გასულან, სხვა საქმეა, რომ ჩვენებზე უკეთეს პოზიციებს იკავებენ.

საქართველოს ეროვნული ნაკრები სერბეთს არასოდეს შეხვედრია, თუმცა ჰქონია დაპირისპირებები ყოფილი იუგოსლავიის სხვა ქვეყნებთან: სლოვენიასთან, ჩერნოგორიასთან და ხორვატიასთან.

თბილისში სამივეს შევხვედრივართ და არცერთხელ არ წაგვიგია. მეტიც, ერთი ისეთი მოგება გვახსოვს... ექვსი წლის წინ თემურ ქეცბაიას გაწვრთნილმა გუნდმა 1:0 სძლია ხორვატიას. ლევან კობიაშვილის ბოლო წუთზე გატანილმა გოლმა "დინამო არენაზე" ყველა გადარია.

ისე, სტუმრადაც ვიგებდით 75-ე წუთამდე, თუმცა ხორვატებმა კოლოსალური სათამაშო უპირატესობა ბოლოს გოლებად აქციეს.

კარგი მატჩი ჩაატარეს ჩვენებმა 2010 წლის შემოდგომაზე, სლოვენიასთან გასვლაზე. აგებდნენ, მაგრამ ჯერ სანდრო გურულმა გაათანაბრა სლოვენიელი მცველის უხეში შეცდომის შემდეგ. ერთ წუთში კი ჯანო ანანიძე გავიდა მეკარესთან პირისპირ და ზუსტად დაარტყა. ქეცბაიას გუნდმა ის წელიწადი (2010) წაუგებლად დაასრულა.

დანარჩენი ურთიერთშეხვედრებიდან კი სასიამოვნოდ გასახსენებელი არაფერია.

8.02.1994. ლა-ვალეტა (მალტა). ტურნირი

სლოვენია-საქართველო 1:0

გოლი: 1:0 გლიჰა (81)

27.03.1999. თბილისი. შესარჩევი

საქართველო-სლოვენია 1:1

გოლები: 1:0 ზაზა ჯანაშია (42), 1:1 კნავსი (52)

4.09.1999. ლიუბლიანა. შესარჩევი

სლოვენია-საქართველო 2:1

გოლები: 1:0 აჩიმოვიჩი (47), 1:1 შოთა არველაძე (55), 2:1 ზაჰოვიჩი (80)

17.11.2010. კოპერი. ამხანაგური

სლოვენია-საქართველო 1:2

გოლები: 1:0 ცეზარი (53), 1:1 სანდრო გურული (66), 1:2 ანანიძე (67)

მე-40 წუთზე ლორიამ მოიგერია პენალტი

1.04.2009. თბილისი. შესარჩევი

საქართველო-მონტენეგრო 0:0

10.10.2009. პოდგორიცა. შესარჩევი

მონტენეგრო-საქართველო 2:1

გოლები: 1:0 ბატაკი (13), 1:1 დვალიშვილი (45), 2:1 დელიბაშიჩი (77)

26.03.2011. თბილისი. შესარჩევი

საქართველო-ხორვატია 1:0

გოლი: 1:0 კობიაშვილი (90)

3.06.2011. სპლიტი. შესარჩევი

ხორვატია-საქართველო 2:1

გოლები: 0:1 კანკავა (17), 1:1 მანჯუკიჩი (75), 2:1 კალინიჩი (78)