მემფისის ღია ტურნირის ფინალში რაიან ჰარისონმა ქართველი ნიკოლოზ ბასილაშვილი 6:1, 6:4 დაამარცხა და კარიერაში ATP-ის ტურნირი პირველად მოიგო. ნიკოლოზმა კი ავსტრიის ღია პირველობის შემდეგ მეორე ფინალი წააგო.
პირველ სეტში ბასილაშვილი მეოთხე გეიმზე დაბრეიკდა და ამის შემდეგ, ბევრ შეცდომასთან ერთად ემჩნეოდა, რომ მეორე სეტისთვის ემზადებოდა და დიდად აღარც იბრძოლა. მეორე სეტში ქართველის იმედები არ გამართლდა და ამერიკელმა მეხუთე გეიმზე მეტოქეს მოწოდებაზე მოიგო. მიუხედავად წინ გასვლისა, ნიკოლოზს ამის შემდეგ უკუბრეიკის და კიდევ ორჯერ წინ გასვლის ჩინებული შანსი ჰქონდა, თუმცა ჰარისონმა შესაშური გამძლეობა გამოიჩინა, ქართველი შეცდომებით დაეხმარა და გამარჯვებული გახდა.
ცენტრალურ კორტზე შეკრებილმა გულშემატკივრებმა, მათ შორის რამდენიმე ადამიანი ქართველიც იყო, სანახაობრივი თამაში უფრო მეტად ბასილაშვილისგან იხილეს. ჰარისონმა კი თავისი მხარდამჭერები შესაშური ფიზიკური გამძლეობით გააოცა. ნიკა ბევრს ცდილობდა მეტოქის საწინააღმდეგო მხარეს ბურთის გადაგზავნას, რაიანი კი თითქმის ყველა მომენტში იბრძოდა და მეტოქის შეცდომებს ელოდებოდა. მართლაც, ამერიკელის გამარჯვებაში დიდი წვლილი ბასილაშვილის არასწორმა სათამაშო ეპიზოდებმაც შეიტანეს.
მიუხედავად იმისა, რომ ჰარისონი კარგი ტაქტიკით თამაშობდა და სანახაობრივი ჩოგბურთით არ გამოირჩეოდა, ამერიკელს შრომა დაუფასდა, შედეგი ამას მეტყველებს. ნიკას სასიკეთოდ ის ითქმის, რომ სტილი არ შეიცვალა აგრესულად თამაშობდა და თუ მომავალში უფრო მეტად სიზუსტეზეც გააკეთებს აქცენტს, უფრო კარგი შედეგი ექნება.
განვლილ შეხვედრაში რაიანმა 9 ეისი მოაწოდა, ხოლო ბასილაშვილმა - 1. ქართველმა ორჯერ დაუშვა ორმაგი შეცდომა და მეორე სეტში ზუსტად ამ კომპონენტის გამო დაბრეიკდა. ჰარისონმა განვლილ შეხვედრაში 12-ჯერ შეძლო საკუთარი მოწოდების გადარჩენა, ნიკამ კი - 7-დან 4-ჯერ.
საბოლოოდ ბასილაშვილის გამოსვლა მემფისში დადებით შეფასებას იმსახურებს, რადგან ორი კვირის განმავლობაში ქართველი ჯერ სოფიას ტურნირზე გავიდა ნახევარფინალში, ახლა კი პროგრესი განიცადა და ფინალში იასპარეზა. ამ ტურნირზე გადამწყვეტ შეხვედრაში მონაწილეობით ნიკოლოზმა 150 სარეიტინგო ქულა და 60, 355 დოლარი გამოიმუშავა. ლაივ-რეიტინგში ბასილაშვილი 53-ე ადგილზე იმყოფება, რაც მისთვის კარიერაში საუკეთესო შედეგია.
