"პარი სენ ჟერმენის" მთავარმა მწვრთნელმა უნაი ემერიმ "ბორდოსთან" მოგებული (2:0) ლიგა 1-ის მერვე ტურის მატჩის შემდეგ დუბლის ავტორი ედინსონ კავანი შეაქო და განაცხადა, სამხრეთამერიკელმა თანაგუნდელებს რწმენა დაუბრუნაო.

"მისი გოლები უმნიშვნელოვანესია. ეს მას თავდაჯერებულს ხდის და თავისი გოლებით თანაგუნდელებსაც რწმენას უბრუნებს. ფეხბურთელები ერთად ფიქრობენ, ერთად მოქმედებენ და ეს კარგია." - განუცხადა BeIN Sports-ს ესპანელმა სპეციალისტმა.

მიმდინარე სეზონში კავანიმ 9 მატჩში 11 გოლი გაიტანა. ემერიმ ჰატემ ბენ არფა მოედანზე 79-ე წუთზე შეიყვანა და კომენტარი ფრანგის შესახებაც გააკეთა: "ბენ არფა მოედანზე გვიან შევიყვანე, მოტივირებული იყო და კარგად ითამაშა, მაგრამ შედეგიანად ასპარეზობისთვის მას ბევრი მუშაობა მართებს."

პსჟ-მ "ბორდოსთან" მოგების შემდეგ საფრანგეთის ჩემპიონატში 16 ქულა დააგროვა და მესამე ადგილზე იმყოფება. პარიზელები პირველადგილოსან "მონაკოს" სამი ქულით ჩამორჩებიან, ხოლო "ნიცას" - ერთით.