ის რაც ვერ შეძლო საქართველოს ძიუდოისტთა ნაკრებმა, რიო 2016-ზე პარაძიუდოისტთა ნაკრების წევრმა ზვიად გოგოჭურმა გააკეთა. 90 კილოგრამ წონით კატეგორიაში მოჭიდავე 29 წლის ქართველმა პარასპორტსმენმა ბრაზილიურ ტატამზე სამი შეხვედრა ჩაატარა, სამივე მოიგო და პოდიუმის უმაღლეს საფეხურზე ავიდა. ამასთან, საქართველოდან პირველი სპორტსმენი გახდა, რომელმაც პარალიმპიურ თამაშებზე მედლის მოპოვება შეძლო. ისტორიული მედალი ოქროსია და შესაბამისად, რიო დე ჟანეიროში საქართველოს ჰიმნიც აჟღერდა.

90 კილოგრამის ოლიმპიურ კონკურენციაში სულ 11 პარაძიუდოისტი ჩაება. გოგოჭური წილისყრამ მეორე წრეში – მეოთხედფინალში განთესა და მას ფინალის გზაზე ორი შეხვედრის მოგება ეყო.

საქართველოს ძიუდოისტთა ნაკრების ყოფილი წევრი, რომელიც პარაძიუდოისტთა გუნდში მხედველობის პრობლემის გამო მოხვდა, საქმეში მეორე წრიდან – მეოთხედფინალიდან ჩაერთო და არგენტინელ ხორგე ლენცინას წუთსა და 38 წამში მოუგო იპონით. ნახევარფინალში კი ამერიკელი დარტანიონ კროკეტი წუთნახევარში შებოჭა.

ზვიად გოგოჭურმა გადამწყვეტ ბრძოლაშიც ვადაზე ადრე მიაღწია წარმატებას - უკრაინელ ოლექსანდრ ნაზარენკოს დაუპირისპირდა და უილეთო შეხვედრაში, 4 წუთსა და 16 წამში 4 გაფრთხილება მიაღებინა.

რიო დე ჟანეიროს პარალიმპიურ თამაშებზე საქართველო 5 სპორტსმენით გაემგზავრა. ძვიად გოგოჭშურის გარდა, ქართულ განაცხადში ირმა ხეცურიანი (ეტლით ფარიკაობა), აკაკი ჯინჭარაძე (წოლჭიმი). ვანო წიკლაური (პარამშვილდოსნობა) და ლია ჩაჩიბაია (ცურვა) მოხვდნენ.